Чаллының Вахитов исемендәге 2 нче татар гимназиясе 110 еллык юбилеена кунак җыя

27 гыйнвар көнне Мулланур Вахитов исемендәге 2 нче гимназия үзенең 110 еллык зур юбилеен билгеләп үтәчәк. Бай тарихлы һәм традицияле мәктәп, гасырдан артык вакыт эчендә никадәр укучыга олы тормышны иңләп очарга канатлар биргән. Данлыклы белем йортын тәмамлап чыккан укучылар бүген илебез, республикабызның төрле өлкәләрендә намуслы хезмәт куя, дип яза “Шәһри Чаллы” газетасы.

Юбилей тантанасы Королев урамы, 20 нче йорт адресы буенча урнашкан 2 нче гимназиядә киләсе атна җомгасында иртәнге 10да башлана. Башта гимназиянең актлар залында тантана үткәрелә, аннары бәйрәм сәгать көндезге 4тә “Энергетик” мәдәният сараенда дәвам иттерелә.

Мәктәпне кайсы гына елда тәмамласагыз да, кайда гына яшәсәгез дә, барлык эш-мәшәкатьләрегезне калдырып, мәктәбебез юбилеена килми калмагыз, дип, М.Вахитов исемендәге 2 нче гимназия коллективы шәһәр газетасы аша чакыру таратты.

"Татар-информ" МА материаллары буенча.