«Нефтьченең бер көне» бәйгесе җиңүчеләре бүләкләнәчәк

Тиздән «Татнефть» акционерлык җәмгыяте һәм «Гаилә һәм мәктәп» журналы редакциясе тарафыннан оештырылган «Нефтьченең бер көне» бәйгесе җиңүчеләре бүләкләнәчәк.
«Нефтьченең бер көне» бәйгесенә Татарстанның төрле шәһәр-районнарыннан – Казан, Яр Чаллы, Алабуга, Актаныш, Мөслим, Сарман, Саба, Арча, Кукмара, Нурлаттан байтак эшләр килде. Һәр ясалган рәсем, язылган хикәяләрдән балаларның нефтьче һөнәре белән кызыксынуы күренеп тора. Һәр эш үзенчә кызыклы, игътибарга лаек. Әмма бәйге булгач, аның җиңүчеләре дә булырга тиеш. Ә аларның исемнәре әлегә сер булып калсын.
Җиңүчеләрне котлау тантанасы 4 август көнне Әлмәттә «Татарстан нефтенең 60 еллыгы» исемендәге мәдәният һәм ял паркында үтәчәк. Балаларны күңелле аттракционнар һәм зур концерт тамашасы көтә. Вәгъдә ителгән «ЛЕГО» конструкторлары инде әзер.