Бүген укучылар рус теленнән БДИ тапшыра

Тапшыру мәҗбүри булган бу бердәм дәүләт имтиханына Татарстанда 19 мең 975 укучы килгән, якынча 5,5 меңе – Казаннан.

26 нчы майда укучылар рус әдәбиятыннан һәм географиядән БДИ тапшырды. ТР мәгариф һәм фән министрының беренче урынбасары Данил Мостафин билгеләп үткәнчә, аларның нәтиҗәләре турында сөйләргә әле иртәрәк. Беренче имтиханнарда видеокүзәтү һәм онлайн-трансляция оештырылган. Имтиханнан чыгарып җибәрүләр булмаган. “Рус әдәбиятыннан һәм географиядән беренче ике имтихан оештырылган төстә узды”, - диде урынбасар.

Өченче көн Дәүләт имтихан комиссиясе утырышы булган, анда беренче БДИ нәтиҗәләре буенча оештыру һәм техник мәсьәләләр каралган.