Казанда “Киң колачлы диктант”ны “бик яхшы” билгесенә 60 кеше язган

12 апрельдә узган дөньякүләм “Киң колачлы диктант” акциясендә Татарстаннан 1321 кеше катнашкан, шуның 780е – Казаннан. Башкаладан тыш, Татарстанда диктантны Яр Чаллыда, Түбән Камада һәм Бөгелмәдә язганнар. Казанда диктантны “бик яхшы” билгесенә 60 кеше язган.

“Киң колачлы диктант” – ел саен уздырыла торган мәгариф акциясе, ул грамоталылык мәсьәләләренә игътибар итүгә һәм грамоталы язу культурасын үстерүгә юнәлдерелгән.

Быел диктантның интернет-аудиториясе 3 тапкырга арткан. Россиянең 6 шәһәреннән оештырылган онлайн-трансляция ярдәмендә диктант барышын 52 мең кулланучы караган. 6,5 меңнән артык кеше диктантны онлайн режимда язган.