Мәктәпләрдә катлаулы тел материалыннан азат ителгән яңа дәреслекләр кулланыла башлаячак

“Татар телен һәм татар әдәбиятын укыту концепциясе” проектын тикшерү буенча фикер алышуга багышланган республика киңәшмәсендә  ТР мәгариф һәм фән министры урынбасары И.Мөхәммәтов әти-әниләрнең мәктәп дәреслекләренең эчтәлеге белән канәгать түгеллеге хакында әйтте.

"Шуңа күрә бу елның 1 сентябреннән гамәлдәге дәреслекләр белән бергә мәктәпләрдә катлаулы тел материалыннан азат ителгән яңа дәреслекләр кулланыла башлаячак. Яңа буын дәреслекләре белән бер комплектта аудио әсбаплар да чыгарылачак.

Рус телендә аралашучы балалар өчен яңа буын «Сәлам!» дип исемләнгән укыту-методик комплекты эшләнде. Аны мәктәпләрдә сынап карау дәвам иттерелә”, - дип белдерде ул.