Удмурт кылъя но литературая урокъёсамы выль амалъёсты кутон

Ираида ЧЕРНОВА, учитель удмуртского языка и литературы МБОУ «Ципьинская средняя общеобразовательная школа»

Татарстан улосамы улӥсь тросэзлы удмуртъёс понна анай кылэз дышетон туала дырын валтӥсен но кулэен уг лыдъяськы ни. «Малы кулэ со? Кытчы соин мынод?»- шуэмзы потэ. Нош анай кылэз гажан мылкыд семьяын пыӵаны кулэ. Мон малпасько,ас калыкедлы кулэ луон понна,анай кылэз одно ик дышетоно. Соин но удмурт кылъя но литературая дышетӥсьёс азязы таӵе ужпумъёс пукто: удмурт кыллэсь чеберзэ, аспӧртэмлыксэ, узырлыксэ возьматоно; анай кылэз яратон но анай кылыныд данъяськон мылкыд пыӵатоно; вераськон кылзэс узырмытоно.

Ма кароно, кыӵе амалъёс кутоно, пиналъёс та предметэз мед яратозы шуыса? Нырысь ик, дышетӥсь ачиз мед яратоз но гажалоз ас кылзэ но предметсэ. Урок – со дышетӥсьлэн быгатонлыкъёсызлэн, тодон-валанэзлэн синучконэз. Али пӧртэм амалъёс, инновационной технологиос вань.

Урокъёсамы кутӥськом критической мышлениея технологиез: кластер,синквейн, фишбоун амалъёсты, кудъёсыз пиналэз малпаськыто. Тужгес секытэз, но тунсыкоез амал – технология творческих мастерских, кудӥз кулэ каре йырвизьмын рос-прос бугыръяськемез. Урокъёс тунсыкоесь луо соку, куке кутэмын луэ компьютер. Быдӟым классысь пиналъёс асьсэос но мультимедийной презентациос дасяло. Урокъёсмес, вераськон кылмес куддыръя узырмытӥськомы ӟуч, бигер, англи кылъёс пыртылыса, куара, конструкция ласянь ӵошатыса. Малы таӵе уж кулэ? Дышетскисьёс сочинение гожтыкузы, нырысь ӟуч сямен малпасько, собере - удмурт сямен. Нош предложенизы но куд-ог кылъёссы кылё ӟуч манеръя. Соин урокъёсамы трос кутӥськомы берыктон ужез но: ӟуч кылысь удмурт кылэ яке удмуртысь ӟуче. Чебер литературной кылэз дышетон кунгож кылэз дышетонлэсь но секыт йӧтэ.

Пиналъёслэсь кылтӥрлыксэс узырмыто фольклорысь пичи жанръёс: визькылъёс, лэчыт кылъёс, мадиськонъёс, калык чакланъёс но мукет. Таос урокъёсамы пӧртэм темаос ортчытыку, воспитательной ужпумъёсты быдэстыны юртто.

Литературая урокъёсын писательёслэсь но поэтъёслэсь творчествозэс мукет калык писательёслэн но поэтъёслэн творчествоенызы ӵошатыса сётыны тыршиськом. Кылсярысь, М.Петров «Италмас» поэма но М.Лермонтов «Незабудка» кылбур, Г.Красильников «Вуж юрт» но В.Тендряков «Не ко двору», Ашальчи Оки но Анна Ахматова но мукет.

Куке но вал туж тунсыко урок - «История и культура родного народа». Макем трос материал сётэммы луэ вал та урокъёсамы. Нош али со курсысь темаосты быгатэммыя пыртыны тыршиськом литературая но кылъя урокъёсамы.

Таяз дышетскон арын выль технологиос пӧлы ватсаськиз на Сингапур проект. Урокъёсамы куд-ог приёмъёссэ пыртон пиналъёслэсь дышетскон мылкыдзэс эшшо но ӝутэ кадь потӥз. Шумпотыса витё вуоно уроксэс, мар выльзэ ужалозы меда шуыса.

Анай кылэз дышетыны пӧртэм луонлыкъёс кылдытэмын кадь, но уг тырмо учебникъёс, методической литература. Озьы ке но, пиналъёс тыршо анай кылын тодон - валан басьтыны, пырисько олимпиадаосы, вань вормонъёссы.