Марсель Сәлимҗановның 90 еллыгына багышланган күргәзмә ачылды

Күргәзмәдә 300 гә якын экспонат тәкъдим ителгән. Аның яртысыннан артыгы – Милли музей фондларыннан. Режиссер хәләл җефете Гөлнара Сәлимҗанова күргәзмәгә гаилә архивыннан 68 әйбер тапшырган, Камал театры фондыннан исә 50 дән артык әйбер – костюмнар һәм декорация эскизлары тапшырылган. 

— Бүген шәһәр һәм республика күләмендә талантлы кешеләрне берләштергән күренекле  шәхес Марсель Сәлимҗановка  багышланган чаралар үткәрелә. Безнең өчен бу күргәзмәнең ачылышы – зур мәртәбә генә түгел, ә бурычыбыз да, – дип сәламләде Татарстан Милли музее директоры Алисә Вяткина.

Кичәдә Марсель Сәлимҗановның фикердәшләре, шәкертләре режиссер белән бәйле булган якты хатирәләре белән уртаклашты. 

— Безнең шикелле авылдан килгән гади авыл малае түгел, ә театрны күргән, аның тарихын белгән кеше иде. Шуңа күрә безгә аның белән эшләве җиңел булды. Мин аңа бик рәхмәтле. Мәсәлән, мине популяр иткән спектакль – аның «Американ»ы иде. Шуннан мин популяр булып калдым, — дип сөйләде Россиянең һәм Татарстанның халык артисты Равил Шәрәфиев.

— Марсель Хәкимович Татарстанда гына танылып калмады. «Это театр Марселя Салимжанова»,  – дип Мәскәүдә  дә әйтәләр иде. Бу зур бәя... Ул үзенең олпатлыгы белән яраттыра белде, — дип өстәде артист. 

— Марсель — абый бик белемле, эрудициясе көчле булган кеше. Билгеле, мондый шәхес кенә татар театрын алып бара ала инде. Аның һәр әйткән сүзе диярлек бүгенге көндә канатлы сүз булып яңгырый, – дип сөйләде сәнгать фәннәре докторы, Татарстанның атказанган сәнгать эшлеклесе Рауза Солтанова. 

Күргәзмәнең үзәк урынын 2001 елда Марсель Сәлимҗановка тапшырылган «Алтын битлек» премиясе алып тора. «Марсель Сәлимҗанов: тылсымлы театр» күргәзмәсе Милли музейның овал залында урнашкан. Күргәзмә ачылышына керү ирекле.

Биредә режиссерга бирелгән бүләкләрне күреп була: Габдулла Тукай исемендәге Дәүләт премиясе лауреаты дипломы (1971), Станиславский исемендәге Дәүләт премиясе дипломы (1979), «РСФСРның халык артисты» исемен бирү турында грамота (1980), «СССРның халык артисты» таныклыгы (1985).

Автор фотолары