Казанда узачак фәнни конференциядә язу тарихы турында фикер алышачаклар

 Татарстан Республикасы Фәннәр академиясе, Россия Фәннәр академиясе Санкт-Петербург Тарих институты, РФА Рус әдәбияты институты (Пушкин йорты), Россия Фәннәр академиясе китапханәсе, Татарстан Республикасы Милли китапханәсе катнашында 17-19 октябрьдә Казан шәһәрендә Европа цивилизациясе һәм Россия халыкларының язма мәдәнияте тарихына багышланган Халыкара фәнни конференция узачак. Бу хакта матбугат конференциясендә Татарстан Республикасы Фәннәр академиясенең А.Х.Халиков исемендәге Археология институты директоры тарих фәннәре докторы Айрат Ситдыйков хәбәр итте.

Конференция кысаларында XIV гасыр башына караган уникаль архив материаллары тәкъдим ителәчәк. Экспонатлар арасында Кол Галинең «Кыйссаи Йосыф» әсәре, кеше тәне төзелешенә багышланган  XIV гасыр кулъязмасы булачак.