Татар блогерлары эшчәнлеге милләтебезгә ни бирә?

Бүгенге татар блогерлары эшчәнлегенең милләтебез, телебез өчен файдалары бармы? Булса, ул нидән гыйбарәт? Бу сорауга узган матбугат конференциясендә күпләргә социаль челтәрләрдә "Кызык-мызык" аккаунтын алып баручы буларак таныш Ильназ Габидуллин җавап бирде. "Әлеге аккаунтны ачып җибәргәндә минем максат үземнең авылдашларны берләштерү иде. Ә бүгенге көндә инде әлеге проект аша бөтен дөнья татарлары берләште дип горурланып әйтә алам. Чит төбәкләрдә яшәүче татарлар безне күзәтеп бара. Кызганычка каршы, аларның күбесе татар телен камил дәрәҗәдә белеп бетерми.  Шул сәбәпле, алар әгәр дә мин әдәби телдә язам икән,  "бу нәрсәне аңлата?" дип сораулар бирә башлыйлар. Аларны беркайчан да кире каккан юк, һәрбер сүзне аңлатып бирергә тырышабыз", - ди  блогер. Димәк, мондый проектлар телне өйрәнү һәм саклау өчен дә файдалы.