Сабантуй 4 июльдә онлайн-форматта узачак

Сабантуйны ТНВ телеканалы һәм «Болгар» радиосы трансляциялиячәк. Бәйрәм өчен мәйдан һәм сценарий әзерләнә, оештыру комитеты төзелгән. Онлайн-форматта Сабантуйның бөтен традицияләре күрсәтеләчәк: концерт, билбау көрәше, атлар чабышы, авыл хезмәтчәннәрен зурлау һ.б. Трансляция иртәнге 8 сәгатьтә башланып, 20.00 гә кадәр дәвам итәчәк.

«Пандемия бераз чигенсә дә, халык өчен куркыныч әле бетмәде. Авылларда күпчелек өлкән яшьтәге кешеләр яши, өстәвенә шәһәрдән туган-тумачалар да кайта. Шуңа күрә Сабантуйны онлайн рәвештә уздыру карары кабул ителде. Бәйрәмне республикада яшәүчеләр генә түгел, бөтен дөньяга сибелгән милләттәшләребез дә күзәтә алачак», – дип белдерде ТР Премьер-министры урынбасары Васил Шәйхеразиев.

Моннан тыш, 10 июльдә Бөтендөнья виртуаль Сабантуен уздыру да планлаштырыла.

Добавить комментарий