IX «Һөнәр» фестивале якынлаша

Быел Казанда тугызынчы тапкыр үткәреләчәк «Һөнәр» Бөтенроссия яшь татар режиссурасы фестивале 9-14 декабрь көннәренә билгеләнгән.

Фестивальнең программа директоры, Камал театрының әдәби бүлек мөдире Нияз Игъламов әйтүенчә, бу фестивальнең узенчәлеге шунда: анда төрле формадагы, төрле халык әдәбиятына караган, төрле чорларда язылган әсәрләр буенча спектакльләр куелачак.

Әлеге фестиваль кысаларында татар һәм рус телләрендә 15 спектакль күрсәтеләчәк. Аларны Камал театрының Зур һәм Кече сәхнәләрендә, Яшь тамашачылар театрында, «Әкият» курчак театрында, «Угол» иҗат лабораториясендә, М.Сәлимҗанов исемендәге актерлар йортында, АРТХАБ арт-резиденциясендә карап булачак.