«Күркәм гаилә – 2016» бәйгесе Балтачта!

«Гаилә һәм мәктәп» журналы тәкъдиме белән оештырылган «Күркәм гаилә – 2016» бәйгесенең район турлары дәвам итә. 19 ноябрьдә Нөнәгәр авылы мәдәният йортына Балтач районының үрнәк, җырга-моңга оста, килен-каенана белән бергә яшәүче күркәм гаиләләре җыелды. Әлеге бәйге Балтачта узган ел да үтте. Быелгысы тагын да үзенчәлекле булды.

 

dsc_0214

Беренчедән, сәхнәгә 25 гаилә чыкты(!) Дөрес, барысы да чыгыш ясамады, чөнки алар зона турларында үзләрен күрсәткән инде. Шулар арасыннан иң-иң дип табылган 7 гаилә Казанда узачак «Күркәм гаилә — 2016» бәйгесенең финалында катнашу өчен көч сынашты.

«Быел конкурста катнашучыларга төп шарт – җиде буынны белү,- диде Балтач районы башкарма комитеты мәгариф идарәсе методисты Резидә Гаязова. – Һәр гаилә ата-баба шәҗәрәсен төзеде. Шуңа нигезләнеп сәхнәдә дә үзләре белән таныштырдылар».

Чынлап та, сәхнәгә чыккан һәр гаилә үзенең нәсел җепләре турында сөйләде. Дүрт яшьлек малайдан башлап 70 яшьлек бабайга кадәр горурланып: «Мин нәселемне беләм»,- дип шар ярды!

…Ике сәгатьтән артыкка сузылган кичә җанлы узды. Концерт номерларыннан тыш һәр гаилә үзенә бер фәлсәфә әйтте. Мәсәлән, Пүскән авылында яшәүче өч бала атасы Гарифуллин Фәнис: «Без методик хезмәтләр укымадык, балаларны эш белән тәрбиялибез. Гел бергә без, балалар ата-анадан күреп үсә»,- диде. Куныр авылында яшәүче Илгизәр-Айгөл Сафиуллиннар исә өч буын бергә яши икән. Дәү әни кеше, Җиһания апа бар халыкка: «Төп нигезгә килен булып төшүдән курыкмагыз, балаларыгызга һәрвакыт күз-колак без, кайткан төшегезгә аш пешкән, чәй кайнаган була»,- диде.

«Күркәм гаилә – 2016» бәйгесе финалына Нөнәгәр авылыннан Тляковлар һәм Субаштан Фәезовларга чакыру тапшырдык. Бу гаиләләр сәхнәдә үзләрен иркен тотты, өстәвенә җыр-моңга осталар, музыка уен коралларында уйныйлар. Алар Балтач данын Казанда яклаячак.

Р. ФАЗЫЛОВА

dsc_0218

Балтачта узган «Күркәм гаилә – 2016» бәйгесеннән тулы фоторепортажны безнең сайтыбызда карый аласыз

Добавить комментарий