«Алтын мөнбар»: татар киносы нинди юлдан бара?

Фестивальдә татар киносының бүгенге хәле дә ачык сөйләшү темасына әйләнде. «Алтын мөнбар»ның башкарма директоры Миләүшә Айтуганова татар телендә фильм төшерү һәм аны прокатка чыгару белән бәйле кыенлыкларга тукталды. Аның сүзләренчә, татар телендә генә төшерелгән фильмга прокат таныклыгы алу җиңел түгел. Шуңа күрә татарча картиналарда дубляж яки voice-over кулланырга туры килә.

Бу мәсьәлә фестивальнең ачылыш фильмы — Шиһабетдин Мәрҗани турында «Укытучы» картинасы мисалында да күренә. Татарстан, Россия һәм Үзбәкстан катнашында төшерелгән фильм өч телдә — татар, үзбәк һәм рус телләрендә тәкъдим ителәчәк.

Режиссёр Булат Минкин да татар телендә кино төшерү өчен финанс табуның авыр булуын әйтте. «Татаркино»ның яңа директоры Илъяс Гафуров яшь режиссёрлардан да шундый ук зарлар ишетүен белдерде. Аның фикеренчә, татар телендәге фильмнарга журналистлар һәм кинотеатрлар аеруча игътибарлы булырга тиеш.

Фестивальдә Татарстан белән бәйле «Моң» фильмы да катнаша. Аны Чаллыда туган режиссёр Софья Чигирова төшергән. Картина Татарстанда эшләнгән, җирле артистлар да катнашкан, әмма фильм Санкт-Петербург студиясе проекты булып тора. Гафуров, иҗат төркеменең зур өлеше Татарстаннан булуын исәпкә алып, «Моң»ны республика киносы дип карарга мөмкинлеген әйтте.

Татарстан фильмнарының прокаты да аерым сорау булып кала. Мәсәлән, Радик Кудояровның «Кара урман» фильмы республикада актив рекламаланса да, ЕАИС мәгълүматлары буенча, аның кассасы 623 мең сум тәшкил иткән, картинаны 2,5 меңгә якын кеше караган.

Әмма «Алтын минбар»да киноның киләчәге турында сөйләшү моның белән генә чикләнмәячәк. Фестивальнең төп максаты — фильмнар күрсәтү белән беррәттән, татар һәм Татарстан киносын тамашачыга җиткерү юлларын эзләү. Ә бу юлда тел, финанс һәм прокат мәсьәләләрен бергә хәл итәргә туры киләчәк.

Автор фотолары