Укытучы — «Республика тарихында үзеңне тап» бәйгесендә

Зәй районы укытучысы «Республика тарихында үзеңне тап» бәйгесендә катнашырга теләк белдерде. 
Татарстанда «Республика тарихында үзеңне тап» бәйгесе игълан ителде. Катнашучылардан 100let.tassr@mail.ru электрон адресына гаилә фотосурәтен һәм аңа бәйле тарих турында яисә 1920 елдан 2020 елга кадәрге чорда Татарстан территориясендә булган берәр вакыйга турында хәбәр юллау соралды.
Фотография һәм вакыйга турындагы хәбәрләр 100.tatarstan.ru сайтында басыла башланды. Беренчеләрдән булып катнашу теләген Зәйдәге 4 нче номерлы мәктәбе рус теле һәм әдәбияты укытучысы Гөлнар Хуҗина белдерде. Ул якташы Мария Хөснетдинованың тормыш юлын бәян иткән.
Мария Николай кызы —  социалистик хезмәт герое. Хатын-кыз тормышының зур өлешен мәктәптә балалар укытуга багышлаган. Үзе теләп колхозда бригадир булып хезмәт куйган.