Яшиселәр бар әле

ТР Министрлар Кабинетының киңәшмәләр залында Сәламәтлек саклау министры Марат Садыйковның журналистлар белән узган очрашу вакытында төп сүз республикада тормышка ашырылучы 49 илкүләм проектның медицина өлкәсенә караган икесе турында сүз барды. Алар – «Сәламәтлек саклау» һәм «Демография» проектлары. Аларның асылы халыкның гомер озынлыгын арттыру һәм үлүчеләр санын киметүгә кайтып кала.

— «Сәламәтлек саклау» проектының гомуми финанслау күләме алдагы өч елда 7 миллиард сумга якын булачак, шуның 72 проценты республикага федераль бюджеттан керәчәк, — диде министр Марат Садыйков.

Бу проект дүрт юнәлешне үз эченә ала: «Беренчел медицина-санитар ярдәм күрсәтү системасын көчәйтү», «Йөрәк-кан тамырлары авыруларына каршы көрәш», «Онкологик авыруларга каршы көрәш», «Балалар сәламәтлек саклау тармагын үстерү». Аның кысаларында 2024 елга таба төрле шештән, шул исәптән яман сыйфатлыларыннан үлем-китү очракларын 100 мең кешегә исәпләгәндә 185 кә кадәр киметү күздә тотыла. «Беренчел медицина-санитар ярдәм күрсәтү системасын үстерү» проекты буенча   2019 елда 1,802 млн кешенең (2017 елда база саны – 1,74; 2024 елда – 2,75) профилактик күренү узасы бар.

Теләсә-кайсы илдә халыкның гомер озынлыгы һәм табигый артымы аның яшәү шартлары һәм төбәкнең уңышлы үсеше турында сөйли. 2024 елга РФ субъектларының сәламәтлек саклаучылары алдында төгәл максатлар куелды. Ул – әнә шул көтелгән гомер озынлыгын арттыру һәм үлемне киметү. Республика табиблары 2024 елда кешенең уртача гөмер озынлыгы – 79, ә 2030 да – 80 ел булыр, дип уйлый.

«Демография» проекты кысаларында, «Җәмгыять саулыгын ныгыту», «Өлкән буын», «Хатын-кызлар мәшгульлегенә ярдәм итү – өч яшькә кадәрге балалар өчен мәктәпкәчә белем бирү шартлары тудыру», «Балалар туганда гаиләләргә финанс ярдәме күрсәтү» программаларын тормышка ашыру күздә тотыла.

                                                                                                          Ирек НИГЪМӘТИ

Добавить комментарий