Шагыйрә Саҗидә Сөләйманованың тормышына һәм иҗатына багышланган китап тәкъдим ителде

12 апрельдә Милли-мәдәни үзәк музеенда күренекле татар шагыйрәсе Саҗидә Сөләйманованың (1926-1980) тормышына һәм иҗатына багышлап «Рухият» мәдәни фонды химаясендә нәшер ителгән «Шигъриятнең күк чәчәге» китабын тәкъдим итү кичәсе булды. Анда шагыйрәнең замандашлары истәлекләр белән уртаклашты, С. Сөләйманованың шигырьләре, аның сүзләренә язылган җырлар яңгырады.

Мәгълүм булганча, Саҗидә ханым яшьлегендә мәктәптә балалар да укыткан, игелекле хуҗабикә буларак да шөһрәт казанган. Бу җәһәттән «Гаилә һәм мәктәп» журналы редакциясе әһелләренең әлеге кичәдә катнашуы табигый иде. Журнал киләчәктә үз сәхифәләрендә шагыйрәнең әдәби мирасына да урын бирергә җыена.