ТР картасын чигүдә 52 оста катнашкан

Әлеге карта республиканың 43 районы, 2 шәһәр округының театраль мәдәни, тарихи биографик элементлары белән чигелгән. Аны булдыруда 52 оста катнашкан. Биредә иң борынгы чигү ысулы — тамбур кулланылган. 

Картага игътибар итсәк: ул дәүләт төсләре белән чигелгән. Һәр төс символик мәгънәгә ия: яшел-тормыш, үсеш һәм яңа казанышларны чагылдыра, ак төс дөньяны, ниятләрнең пакьлеген, кызыл — тормыш төсен, куәтне гәүдәләндерә. 

Проект фәнни консультанты, сәнгать белеме докторы, ТР атказанган сәнгать эшлеклесе, Гүзәл Вәлиева-Сөләйманова чигелгән картаны бик тирән әсәр дип атады: 

— Без әлеге картада тарихны, атап әйткәндә, һәр районның халык сәнгатен берләштердек. Безнең республика халыклар һәм мәдәниятләр төрләренең йолдызлыгы белән аерылып тора. Шуңа күрә карта ул — декоратив пано гына түгел, ә республикабызның һәр районының мәдәниятен ачып бирә торган бик тирән әсәр.

ТР Мәдәният министрының беренче урынбасары Юлия Әдһәмова яшь буынның әлеге чарада катнашуының әһәмиятен билгеләп үтте: 

— Иң мөһиме, бүген биредә безнең яшь буын — безнең яшьләр, балалар бар. Алар традицияләрне сеңдереп, киләчәктә инде үз балаларына тапшырачаклар. Әлеге проект кысаларында катнашкан иң өлкән чигүчегә 73 яшь, һәм ул үзенең тамбурлы чигүдәге осталыгын яшь буынга трансляцияләде.