«Җылы рәхәте» акциясе дәвам итә

«Гаилә һәм мәктәп» һәм «Мәгариф» журналлары редакциясе ноябрь башында инде матур традициягә әйләнгән «Җылы рәхәте» акциясен игълан иткән иде. Салкын кышта кул-аякларыбызны гына түгел, җаннарны да җылытырлык бияләйләр һәм оекбашлар хәстәрләү акциясендә журналларыбызны укучы барлык дусларыбыз да катнаша ала. Аларны йон җептән бәйләргә дә, күннән тегәргә дә мөмкин. Иң мөһиме – ул кул эшләнмәсе булырга тиеш. Милли бизәкләр төшереп эшләнгәннәре аеруча хупланачак.

Акциядә катнашу өчен бияләйләрне 2019 елның 15 декабренә кадәр 420066 Казан, Декабристлар урамы, 2 йорт, а/т 47 адресы буенча яки турыдан-туры редакциягә (7 кат) китерергә кирәк.

Иң оригиналь бизәкле бияләй Якутиягә Бияләй музеена китәчәк. Аның авторы редакциядән махсус бүләк – Г.Камал театрына 2 кешелек билет белән бүләкләнәчәк. Шулай ук редакция хезмәткәрләре белән уңган-булган җиңүчеләргә кунакка кайтырга планлаштырабыз.
Акциядә катнашучы һәркемгә электрон почта аша Катнашучы сертификаты юлланачак. Барлык бияләйләр республиканың балалар һәм картлар йортларына тапшырылачак.

Добавить комментарий