Гаилә бакчалары

Гаилә бакчалары инде яңалык түгел. Кайсыдыр төбәктә андый бакчалар ябыла, кайдадыр ачыла. Моның сәбәбе нәрсәдә? Гаилә бакчалары кирәкме?

Өч игезәк!

Балаларын өендә тәрбияләгән өчен хөкүмәт хатын-кызга хезмәт хакы түли. Тик берничә шарты бар – бер балага, ким дигәндә, дүрт квадрат метр торак мәйданы туры килергә тиеш, салкын-кайнар су, бәдрәф, аерым аш бүлмәсе, балаларга шөгыльләнер өчен бүлмә, махсус өстәл-урындыклар булу зарур.

Казанның Глушко урамында яшәүче Энҗе Гыйматдинованың әлеге өлкәдә тәҗрибәсе зур. Өч игезәк баласын үзе тәрбияли ул. «Ирем Рөстәм белән өйләнешкәч, берничә ел балабыз булмады, шуңа күрә өч игезәкне Ходай бүләге дип кабул иттек», – ди Энҗе.

Гыйматдиновлар өч бүлмәле яңа фатирда яшиләр. Балалары тугач, социаль ипотека программасы нигезендә фатир биргәннәр.

«Безнең бәхеткә, яңа программа керде, – дип сөенә әни кеше. – 2010 елның ноябрендә гаилә бакчасы булып теркәлдек. Мин канәгать. Балаларым һәрчак янымда. Бакчага илтәсе булса, өчесен берьюлы ничек киендереп, ашатып өлгерер идем әле, бигрәк тә кечерәк чакта. Ризыкны якындагы 180нче балалар бакчасыннан барып алабыз. Сөте, ипие, ярмасы, ите – барысы да бушка. Балаларны иртәнге сигездә уятам. Юынабыз, иртәнге ашны ашыйбыз. Быел мәктәпкә керәсе булганлыктан, хәзер көн саен диярлек 180нче балалар бакчасына барабыз. Төшкә кадәр шунда яшьтәшләре белән булабыз. Рәсемнәр ясыйбыз, укырга-язарга өйрәнәбез.

Декрет ялына киткәнче балалар бакчасында эшләдем. Шуңа күрә балалар белән эшләү тәҗрибәм бар. Гаилә бакчасы тәрбиячесе буларак, 15 мең хезмәт хакы алам. 2014 елдан балалар бакчасына ярты көн йөргән өчен акча түли башладык. Бер балага – 1250 сум. Дөрес, түләгәннән соң бу акчаның күпмедер өлеше кире кайта.

Балалар укырга киткәч тә эшкә чыкмам әле, дим. Өч баланы мәктәпкә илтәсе, алып кайтасы, дәресен әзерләшәсе була бит».

Арчада ун гаилә бакчасы ябылган

Биш-алты ел элек Арчада 11 гаилә бакчасы теркәлгән булса, бүген бары Каенсар авылында гына калган. «Элек Арчаның үзендә балалар бакчасында урыннар җитми иде. Шуңа күрә дә гаилә бакчалары ачылды, – диде районның мәгариф бүлеге мөдире Зөлфәт Дәүләтбаев. – Хәзер андый проблема юк дисәм дә була. Районда гаилә бакчаларының кайберләре санитария нормалары, янгын куркынычсызлыгы таләпләренә җавап бирми иде, шуңа ябылды. Кайбер гаиләләрнең балалары мәктәп яшенә җиткән. Соңгы вакытта район мәгариф идарәсенә: «Гаилә бакчасы ачарга телибез», – дип килгән кеше юк. Килүче булса, әлбәттә, без һәр очракны аерым карарга әзер. Гаилә бакчаларына каршы түгелмен. Шулай да, бакчада урын булган очракта, балаларны өйдә түгел, коллективта тәрбияләү ягында мин».

Каенсар авылындагы бакчада тәрбияче Зөлфирә Хәмидуллина авылдашларының балаларын тәрбияли. Балалар бишәү, иң кечесенә – ике яшь ярым, иң зурысына алты яшь икән.

«2009 елның августында Каенсар авылында балалар бакчасы ябылды, – ди Зөлфирә ханым. – Тәрбияче булып эшли идем. Арча район мәгариф бүлегенә эш сорап баргач, гаилә бакчасы ачарга тәкъдим иттеләр. Башта, әлбәттә, каушап калдым. Кайтып тормыш иптәшем, ике кызым белән киңәшләштем. Өйдәгеләр каршы килмәде. Тәвәккәлләргә булдым. Районнан комиссия безнең йорт санитария таләпләренә, янгын куркынычсызлыгына туры киләме дип, тикшерү уздырды. Шулай итеп, 2009 елның 1 октябреннән гаилә бакчасы буларак теркәлдек.

Бездә барысы да гадәти бакчадагы кебек. Иртәнге аш, күнекмәләр, аннан рәсем ясыйбыз, китаплар укыйбыз, урамга чыгабыз… Ризыкны хөкүмәт акчасына сатып алабыз, районнан расланган меню белән ашарга пешерәбез. Ярты ставкада эшли торган пешекчебез бар. Әти-әниләр белән аңлашып эшлибез: бәйрәмнәрдә концертлар әзерлибез. Балалар да авырмый. Ел буена иң кечкенә балабыз, йөткерү сәбәпле, бер атна килми торды. Киләсе елларга да эшләргә теләк бар. Елга бер булса да авылда балалар туа тора».

<…>

Тулы варианты белән «Гаилә һәм мәктәп» журналының №3 (март, 2015) санында танышырга була. («Электрон подписка»да)

Руфия Рәхмәтуллина.

Добавить комментарий