КФУ татар телендә белем бирүче укытучыларны әзерли

Университетның 40 тан артык студенты татар мәктәпләрендә эшләргә әзерләнә. Бу булачак математика, химия, физика биология һәм информатика укытучылары.

«Россия Мәгариф һәм фән министрлыгы Казан университеты алдында татар телле укытучылар әзерләү бурычын (заказ) куймый. КФУ, республика министрлыгы теләктәшлеге белән, татар телле укытучы булырга теләгән яшьләргә мөмкинлекләр тудыра. Мисал өчен, студентлар фәнни терминологияне туган телдә өйрәнә, татар мәктәпләрендә тәжрибә туплыйлар. База мәктәбе буларак 2 нче гимназия билгеләнгән», - дип хәбәр итте журналистларга КФУ ректоры Илшат Гафуров.