Татарстан укучылары «Зур тәнәфес» Бөтенроссия бәйгесе финалында уңышлы чыгыш ясады

Финалга Россиянең төрле төбәкләреннән һәм чит илләрдән килгән йөзләгән укучы җыелды. Берничә көн дәвамында алар экспертлар лекцияләрендә катнашты, командаларда практик биремнәр үтәде һәм үз проектларын яклады.

Татарстан Республикасы Әлки районының Чуваш Борнае мәктәбе укучылары югары нәтиҗәләр күрсәтте. 6 нчы сыйныф укучысы Ильяна Вәлиева, остазы Гөлнара Илгиз кызы Вәлиева җитәкчелегендә, бәйгенең призеры итеп танылды. Ә шул ук мәктәпнең 6 нчы сыйныф укучысы Эмилия Вәлиева җиңү яулап, төп бүләккә – Мәскәүдән Владивостокка кадәр туристик поезд сәяхәтенә лаек булды, дип хәбәр итә ТР Мәгариф һәм фән министрлыгы матбугат хезмәте.

Әлки районыннан тагын бер укучы – Сиктермә урта мәктәбенең 6 нчы сыйныф укучысы Полина Краснопёрова да «Зур тәнәфес» бәйгесе финалы призёры исемен алды.

Бәйге «Яшьләр һәм балалар» илкүләм проекты кысаларында үткәрелә. Ул яшь буынның сәләтләрен үстерү, остазлык институтын ныгыту һәм балалар башлангычларын хуплауга юнәлдерелгән.

Фото: ТР Мәгариф һәм фән министрлыгы матбугат хезмәте