Менделеевскида «Гырон быдтон — 2024» бәйрәме үтте

Татарстанның барлык почмакларыннан,  Россиянең башка төбәкләреннән дә кунаклар җыелды. Бәйрәмдә Татарстан Республикасы Рәисе Рөстәм Миңнеханов, район башлыгы Радмир Беляев һәм башка хөрмәтле кунаклар катнашты. Татарстан Рәисе бәйрәмне оештыруның югары дәрәҗәсен, удмуртларның үз халкының гореф-гадәтләренә, милли киемнәренә һәм мәдәниятенә сакчыл мөнәсәбәтен ассызыклап үтте. Быелгы «Гырон быдтон — 2024» бәйрәмендә башка еллар белән чагыштырганда үзенчәлекләр күзәтелгән. Шуларның берсе – чарада ата-аналарның һәм балаларның күпсанлы катнашуы. Чөнки бәйрәмгә шәһәр һәм районның барлык мәктәпләреннән, балалар бакчаларыннан «Гырон быдтон» бәйрәменә күп балалар килгән. Яшь буынның үз халкының гореф-гадәтләрен онытмаулары милләтнең чәчәк атуы өчен бик мөһим.

Фотолар «Менделеевск хәбәрләре» сайтыннан