«Мирас»та «Кол Шәриф» операсыннан дуэт башкарылачак
Казанда Нәҗип Җиһанов исемендәге «Мирас» татар музыкасы фестивале узачак. Быел фестиваль тугызынчы тапкыр (7, 10, 14 февраль) «Премьералар гына» исеме белән оештырыла.
С.Сәйдәшев исемендәге Зур концертлар залында узачак фестивальдә композиторлар Ильяс Камал, Илһам Байтирәк, Эльмира Галимова, Миләүшә Хәйруллина, Рәшит Кәлимуллиннарның яңа әсәрләре яңгыраячак.
«Мирас» татар музыкасы проектының фәнни-иҗади җитәкчесе Вадим Дулат-Алеев.
Исегезгә төшереп узабыз: «МИРАС» фестивале зур музыкаль мирасыбызны, бүгенге композиторлар иҗатын һәм башкару осталыгын күрсәтү, таныту өчен гамәлгә ашырыла. Казан дәүләт консерваториясен тәмамлаган профессионалларның киләчәк буыннар өчен татар музыкаль мәдәнияте мирасын формалаштыручы замандашларыбыз эше нәтиҗәсе.
Фестиваль программасында композитор Эльмира Галимованың «Кол Шәриф» операсыннан да кисәкләр яңгыраячак. «Музыканың һәрбер жанрында үземнең фикеремне калдырасым килә, – ди Эльмира Галимова. – «Мирас» фестивале өчен махсус атап язганнары да бар. «Кол Шәриф» операсы пандемия чорында иҗат ителде. Ул дүрт кисәктән гыйбарәт. Быел операның өч кисәге «Мирас» программасына кертелде. Сөмбел Ана һәм Юлбарыс-бәк дуэтын солистлар Сөмбел Кыямова һәм Айрат Ганиев башкарачак”.
“Кол Шәриф” операсы – милли рухта иҗат ителгән музыкаль әсәр. Аның тулы вариантын якын киләчәктә Татарстан сәхнәсендә күрергә насыйп булсын иде.
“Кол Шәриф – бөек шәхес, Казан ханлыгының зур әһәмияткә ия, символ дәрәҗәсендәге образы. Аның исемен йөрткән мәһабәт мәчетебез дә бар. Әлеге образны мәңгеләштерү, аның тарихын җәмәгатьчелеккә җиткерү төп максатым иде. Кол Шәриф образы музыкада беренче тапкыр тәкъдим ителә”, – ди композитор үзе.
Мөршидә Кыямова
Фото РТ Мәдәният министрлыгы сайтыннан алынды
Язмага реакция белдерегез
Вход на сайт
Менделеевскида спорт гаиләләре ярышты
Менделеевскидагы 12 нче «Крепыш» исемле балалар бакчасы коллективы Гаилә елын “Әти, әни һәм мин – спорт гаиләсе” дигән спорт бәйрәме белән ачып җибәрде. “Химиклар каласының иң яхшы спорт гаиләсе” исемен дәгъвалауда дүрт гаилә катнашты.
Алар өчен берсеннән-берсе мавыктыргыч бәйгеләр тәкъдим ителгән иде. Командаларының исемнәре генә ни тора! Олейниклар гаиләсе командасы – «Молодецлар», Исакаевларныкы – «Яшен», Камашевлар гаиләсенеке – «Спортчылар», ә Трошиннарныкы «Аюкайлар» иде.
Әлеге бәйгенең нәкъ менә Татьяна Голикова җитәкләгән “Крепыш” балалар бакчасында үткәрелүе бер дә очраклы түгел иде. Бу бакча коллективы кайчандыр үзендә тәрбияләнгән кыз-уллары белән хаклы горурлана. Аларның күбесе, тормышта үз урыннарын тапкач та әле, спорттан аерылмыйча яшәүне өстен күрә. Спорт өлкәсендә казанышларга ирешкәннәре дә шактый. Чөнки алар сабый вакытта – шушы бакчага йөргән чакта – дөрес физик чыныгу алганнар, тәрбияче апалары да күңелләрендә спортка мәхәббәт уята алган. Әле хәзер дә бакча җитәкчелеге элекке шәкертләре гаиләләренең күбесе белән тыгыз элемтәдә тора. “Әти, әни һәм мин – спорт гаиләсе” бәйгесендә кунак буларак катнашкан Язилә Гомәрова белән Азат Камашевлар да балачакта шушы бакчага йөргән булганнар. Инде хәзер алар – тхэквондо буенча уздырылган Бөтенроссия һәм халыкара ярышларының күп мәртәбә җиңүчеләре. Элекке шәкертләре арасында горурланырлык хоккейчылары да шактый. Әйтик, Алия Фәрхетдинова бүгенге көндә Мәскәүдәге «Торнадо» дигән хатын-кызлар командасы составында чыгыш ясаса, ә Богдан Борһанов исә Казанның «Динамо» командасы өчен уйный. Аларга багышланган «Безнең мактаулы шәкертләребез» дигән стенд балалар бакчасы дивары түрендә.
Бакчаның бүгенге шәкертләре дә алар үрнәгендә спортны үз итүләрен бу бәйге барышында кат-кат раслады: тизлектә дә, җитезлектә дә берсенең дә сынатасы килмәде. Бигрәк тә шар кабарту, туннель аша йөгерү бәйгеләре сабыйлар күңеленә хуш килде.
Таһир САБИРҖАНОВ
Следите за самым важным и интересным в Telegram-каналеТатмедиа
Яңалыклар битенә керегез
ТӘКЪДИМ ИТӘБЕЗ
Комментарийлар