«Аллаһның рәхмәтеннән өметне өзмәгез!»

"Ягъкуб галәйһиссәлам үз улларына: "Аллаһның рәхмәтеннән өметне өзмәгез", – диде ("Йосыф" сүрәсе, 87 нче аять).

Йосыф галәйһиссәлам ир туганына: "Аларның кылган нәрсәләре сине борчымасын", – диде. ("Йосыф" сүрәсе, 69 нчы аять).

Пәйгамбәребез Мөхәммәд салләллаһу галәйһи вә сәлләм белән тугры дусты Әбү Бәкер Әс-Ситдыйк радыяллаһу ганһе тау куышлыгында Мәккә мөшрикләреннән яшеренгәндә Әбү Бәкер радыяллаһу ганһе, дошманнарның якынлашуын һәм Рәсүлуллаһка зыян салырга мөмкинлеген күреп, куркып калган. Бу хакта "Кызыл таң" яза.

Моны сизеп, Рәсүлебез салләллаһу галәйһи вә сәлләм: "Өченчеләре Аллаһ булган икәү хакында син ни уйлыйсың?" – дигән. Бу сүзләр нинди авыр хәлдә калсаң да, кайда булсаң да, Аллаһ синең белән бергә һәм бер мизгелгә дә сине калдырмаячак дигәнне аңлата.

Коръәндә: "Безгә Аллаһның язганыннан башка, асылда, берни килмәс. Ул – безнең Яклаучыбыз (Ярдәмчебез һәм Идарә итүчебез). Мөэминнәр Аллаһка гына тәвәккәл итсен", – диелә ("Әт-Тәүбә" сүрәсе, 51 нче аять).
 

Фото: © «Татар-информ» (архив)