Бөгелмәдә яңа гаилә сайлауга туйдан соң ук килгән
Гаилә кору – кеше тормышындагы иң истәлекле көннәрнең берсе. Бөгелмәдә исә Александр һәм Екатерина Левагиннар өчен бу көн тагын бер мөһим вакыйга белән дә истә калган: яшь пар никахларын рәсмиләштергәннән соң ук сайлау участогына барып, беренче тапкыр ир белән хатын буларак тавыш биргән. Бөгелмә районында сайлаулар оешкан төстә уза. Бу хакта район башлыгы Дамир Фәттахов Татарстан сайлауларының Бердәм мәгълүмат үзәгендә узган матбугат конференциясендә хәбәр итте.
Яшь гаилә белән бергә сайлауларда 104 яшьлек Варвара Петровна Павлова һәм Иван Евгеньевич Вавилов та катнашкан. Аларның тормыш тәҗрибәсе белән яшьләрнең гаилә корып, сайлауга бергә килүе – бу көннең үзенчәлекле күренешләренең берсе.
Дамир Фәттахов Бөгелмә халкының сайлаулардагы активлыгын аерым билгеләп үтте. «Без шәһәр һәм район тормышында катнашуга, хакимият белән турыдан-туры диалогка халыкта ихтыяҗның бик югары булуын күрәбез», – диде ул. Район башлыгы фикеренчә, җирле хакимият никадәр ачык эшләсә, халыктан кире элемтә дә шулкадәр күбрәк килә.
«Бөгелмәлеләр үз шәһәрендә, республикада, илдә нәрсә булуына битараф түгел. Бу көннәрдә уза торган сайлаулар – тормышыбыздагы гражданлык активлыгының тагын бер формасы», – дип ассызыклады Дамир Фәттахов.
Гаилә белән сайлауга – икенче ел рәттән
Бөгелмәдә икенче ел рәттән җирле эшмәкәрләрдә сайлау чараларына кушылган. Тавыш биргән шәһәр һәм район халкы өчен кафе, ресторан, кибет һәм спорт объектлары махсус ташламалар һәм тәкъдимнәр әзерләгән. Шәһәрнең үзәк мәйданында традицион көзге авыл хуҗалыгы һәм һөнәрчелек ярминкәсе узган. Тавыш бирүдә катнашучыларга бирелгән беләзекләрне күрсәтүчеләр ярминкәдә 50 процент ташламадан файдалана ала. Ярминкә мәйданында халык өчен 26 сәламәтлек пункты да эшли. Анда гриппка каршы вакцинацияне бушлай ясату мөмкинлеге бар.
Бөгелмәдә 77 сайлау участогы эшли
Районда барлыгы 77 участок комиссиясе эшли. Аларның 48е Бөгелмәдә, шул исәптән Үзәкрайон хастаханәсендә һәм тикшерү изоляторында вакытлыча оештырылган участоклар, 29ы авыл җирлекләрендә урнашкан.
Районда 74 меңнән артык сайлаучы теркәлгән, аларның 908е быел беренче тапкыр тавыш бирә.Барлык участокларда да сайлау барышына күзәтү оештырылган. Бөгелмәдә һәм Карабашта өзлексез видеокүзәтү алып барыла. Өлкән яшьтәге һәм хәрәкәтләнү мөмкинлеге чиклекешеләрнең тавыш бирү мөмкинлегенә дә аерым игътибар бирелә.
«Безнең өчен Бөгелмә халкының үз территориясе тормышында катнашучы булуын, аларның фикере мөһим икәнен аңлавы принципиаль әһәмияткә ия. Кешеләр белән хакимият арасында даими һәм нәтиҗәле диалог булуы мөһим», – диде Дамир Фәттахов.
Татарстанда Дәүләт Думасы депутатларын сайлауның бүген соңгы көне. Сайлау участоклары кичке сәгать 8гә кадәр эшли.
Язмага реакция белдерегез
Вход на сайт
ТӘКЪДИМ ИТӘБЕЗ
Комментарийлар