Ел башыннан Казан әти-әниләре мәктәп туклануы турында 3,8 мең бәяләмә калдырган

 Казан укучыларының ата-аналары ел башыннан ата-аналар контроле журналының электрон версиясендә мәктәп туклануы турында 3800 язу калдырган, шуларның 98%-ы уңай. Ата-аналар мәктәп туклануын яхшыртуга зур өлеш кертә, аның сыйфаты да даими нигездә экспертлар тарафыннан тикшерелә, дип билгеләп үтте Казанның Азык-төлек һәм социаль туклану департаменты директоры Рима Мөхәммәтшина. Шәһәрлеләрнең сорауларына ул Казан Мэриясенең Instagram дагы рәсми битендә туры эфирда җавап бирде.
Исегезгә төшерәбез, ата-аналар контроле бу ел башында Казан Мэры Илсур Метшин инициативасы белән старт алды. Сентябрь башына шәһәрнең барлык мәктәпләре дә электрон версиянең QR-кодлары белән ата-аналар контроле журналлары белән тәэмин ителде, аларда укучыларның ата-аналары көн саен мәктәпләрдәге ризык сыйфаты һәм туклануны оештыру турында үзләренең тәэсирләрен язып бара.
«Ата-аналар контроле зур файда китерә. Ата-аналар ризыкның сыйфатын контрольдә тоту белән бергә, үзләренең мәктәп туклануы турындагы фикерләрен да үзгәртә, – дип саный Р.Мөхәммәтшина.– Күп кенә балалар бүген яшелчә һәм ботка ашамый, сәламәт туклануны сайламый. Берләшеп, без балаларыбызда дөрес азык гадәтләрен формалаштыру өстендә эшли алабыз».
Ата-ана контроле журналларында калган барлык сорауларга һәм кисәтүләргә департамент белгечләре җавап бирә, кирәк була калса чаралар күрелә. «Без мәҗбүри тәртиптә мәктәпкә барабыз, тикшерү үткәрәбез», – дип ассызыклады Р.Мөхәммәтшина.
Тикшерүләр ата-аналарның искәрмәләре буенча гына үткәрелми – шәһәрдә һәр мәктәп департамент хезмәткәрләренең берсенә беркетелгән, ул атна саен анда йөри, производство мөдире белән аралаша, шартларны бәяли. Моннан тыш, белгечләр даими рәвештә азык-төлек продуктларының һәм азык әзерләү урыннарының лаборатор һәм җитештерү контролен уздыра: алар мәктәпләргә чыгалар, әзер ризыклардан һәм җиһазлардан пробалар алалар һәм анализ үткәрәләр.
«Тикшерүнең тагын бер төре бар: көн саен департаментка шәһәрнең очраклы рәвештә сайлап алына торган алты мәктәбеннән ризыклар китерелә, – дип өстәде Р.Мөхәммәтшина. –Без бергәләп аш-суга органолептик һәм лаборатор анализ үткәрәбез».
Сүз уңаеннан, Казандагы барлык мәктәпләр туклануны оештыру принцибы буенча ике төргә бүленә: кайберләрендә ризыкны урыннардагы ашханәләрдә әзерлиләр, башкаларында әзер ризыкларны департамент китерә. Р.Мөхәммәтшина аңлатуынча, бу мәктәптә туклануны оештыру буенча югары стандартлар заманча булмаган биналарда урнашкан мәктәпләрдә аш-су әзерләргә мөмкинлек бирмәүгә бәйле. Мондый очракта төнлә туклану комбинатында ит, кош, балык яки катлаулы гарнир ризыклары әзерләнә, алар шокерларда суытыла һәм мәктәпләргә таратыла.
Шул ук вакытта Казанда азык-төлек блокларын капиталь ремонтлау эше дәвам итә. Татарстан Республикасы башкаласында 15 ел элек беренче тапкыр старт алган «Балалар өчен сәламәт туклану» программасының икенче этабы гамәлгә ашырыла. Бу программа кысаларында ашханәләрне төзекләндерү үткәрелә, ул электр белән тәэмин итү, вентиляция, канализация, җиһазларны модернизацияләү, мебельләрне алыштыру һәм башка эш төрләрен үз эченә ала. Быелгы җәй көне Казанда яңа уку елына 43 мәктәп ашханәсе ремонтланган, шуның нәтиҗәсендә утырту урыннары саны 3,5 меңгә арткан.

Чыганак: Казан мэриясе