Казанда 2,6 миллиард сумга яңа мәктәп төзеләчәк

30 апрель 2026 Мәгариф

«Татлизинг» дәүләт унитар предприятиесе Казанда яңа мәктәп төзү тендерында җиңүче булды. Уку йорты Идел буе районында «Юбилейная станциясе» торак комплексында төзеләчәк. Бу хакта «Казань КП» басмасы хәбәр итә.

Проект Татарстан бюджетыннан финанслана. Аны гамәлгә ашыруга 2,6 миллиард сум акча бүлеп бирелгән. Мәктәп 1501 укучыны кабул итә алачак. Төзелеш ике этаптан торачак. Беренче этапны 2026 елның 1 декабренә тәмамларга планлаштыралар.

Бинада актлар залы, спорт залы, хореография классы, өстәмә белем бирү кабинетлары һәм ашханә урнашачак.