«Мортаза Рәхимов» энциклопедиясе дөнья күргән

Башкортстан Республикасы Фәннәр академиясенең Башкорт энциклопедиясе институты коллективы Башкортстанның беренче Президенты Мортаза Рәхимовның тууына 90 ел тулу уңаеннан «Мортаза Рәхимов» энциклопедиясен әзерләгән һәм бастырып чыгарган. Бу хакта «Башинформ» агентлыгы яза.

Басма Башкортстан Башлыгы Радий Хәбировның 2023 елның 13 февралендәге «Мортаза Гобәйдулла улы Рәхимовның истәлеген мәңгеләштерү турында»гы указы нигезендә нәшер ителгән.

«Әлеге китап – Россия Федерациясендә дәүләт эшлеклесе хакындагы беренче персональ энциклопедияләрнең берсе. Аны әзерләгән вакытта Башкортстан Республикасының беренче Президенты шәхесен объектив кабул итү максатыннан Рәхимовның дәүләт һәм сәяси эшчәнлеген тирәнтен, төрле яклап яктырту мөһим мәсьәләләрнең берсе булды. Мортаза Рәхимовның тормышы һәм эшчәнлеге турында архивта сакланган, төрле чыганакларда дөнья күргән материалларны җыю, аларны системага салу эше оештырылды, басманы әзерләүнең концепциясе, структурасы, методикасы эшләнде, булачак энциклопедиянең сүзләр исемлеге төзелде», – дип хәбәр итте энциклопедияне әзерләүчеләр.

Чыганак: "Татар-информ"