Чувашиядә «Татар теле - халкым теле» бәйгесе узды

Оештыручылар билгеләп үткәнчә, проектның төп бурычы — мәктәпләрдә татар телендә белем бирүче укытучыларның абруен күтәрү, тәҗрибә алмашу мөмкинлеге тудыру һәм Россия төбәкләрендә татар телендә укыту тәҗрибәсен киңәйтү.

Катнашучылар арасында Татарстанның 20 гә якын районыннан һәм Россиянең 5 тән артык төбәгеннән педагоглар бар иде.

КФУ профессоры, филология фәннәре докторы Әлфия Йосыпова чыгышында тел мәсьәләсенең әһәмиятен ассызыклады:

«Татар теленең язмышы безнең кулларда. Бу җаваплы миссияне башкаруыгыз өчен рәхмәт!»

Ике этаптан торган бәйге

Конкурс ике этапта узды:

–  читтән торып катнашу этабы: резюме, эссе һәм санак технологияләрен кулланып, дәрес сценарийлары язу;

–  финал: ачык дәресләр күрсәтү.

Финалга 4 җиңүче чыкты.

Финал исә Чувашиянең Батыр районы Кызыл Чишмә авылында урнашкан «Сәләт-Батыр» үзәгендә үтте. Биредә 100 гә якын кеше катнашты.

Катнашучылар өчен остаханәләр, аралашу мәйданчыклары һәм методик сессияләр оештырылды.

 Бәяләү критерийлары

Бәйге финалистларының дәресләре түбәндәге күрсәткечләр буенча бәяләнде:

1) дәрес структурасы,

2) интерактивлык,

3) проблемалы ситуацияләр куелуы,

4) сөйләм культурасы,

5) технологияләр куллану,

6) укучыларның активлыгы һ.б.

Җиңүчеләр

Конкурс җиңүчеләре арасында:

– Алмаз Җиһаншин (Кайбыч районы),

– Рамилә Абдуллина (Казан),

– Гөлфия Габдуллаҗанова (Лаеш районы),

– Рәзинә Миннегулова (Казан).

Җиңүче фикере

Махсус бүләк иясе Алмаз Җиһаншин конкурста катнашуның төп максаты итеп тәҗрибә туплауны билгеләп үтте:

«Башка фәннәрне татар телендә укытучы мөгаллимнәр күбрәк булсын иде», –  диде ул.

Фото: бәйге матбугат хезмәте