Татарстан вузлары Россия Хезмәт министрлыгының рейтингында

31 март 2026 Мәгариф

Татарстанның 8 югары уку йорты 2026 елгы уку тәмамлаучыларны эшкә урнаштыру буенча Россия Хезмәт министрлыгының Милли рейтингына керде.

Казан федераль университеты (КФУ) сәламәтлек фәннәре һәм гамәли медицина өлкәсендә магистратура һәм ординатураны тәмамлаучыларны эшкә урнаштыру буенча – икенче урында (0,97 балл). Шулай ук уку йорты теология, сынлы һәм гамәли сәнгать, информатика һәм исәпләү техникасы, фотоника һәм биотехник системалар өлкәләрендә дә алдынгылар бишлегендә.
Иннополис университеты информатика һәм исәпләү техникасы буенча бакалавриат һәм белгечлек чыгарылышлары арасында – икенче (1,88 балл), магистратурада – өченче урында (1,54 балл).
А.Н.Туполев исемендәге Казан илкүләм тикшеренү техник университеты (КНИТУ-КАИ) аэронавигация, авиация һәм ракета-космик техника, шулай ук кораб төзелеше һәм су транспорты буенча бакалавриат һәм белгечлек өлкәсен тәмамлаучыларны эшкә урнаштыру буенча – өченче урында, ә магистратурада авиация техникасы һәм машина төзелеше буенча – дүртенче урында.
Казан илкүләм тикшеренү технология университеты (КНИТУ) техносфера куркынычсызлыгы һәм табигатьне төзекләндерү өлкәсендә – дүртенче урында. Түбән Кама химия-технология институты (КНИТУ-КХТИ) сәнәгать экологиясе һәм биотехнологияләр буенча – өченче урында.
Казан дәүләт энергетика университеты физик-техник фәннәр һәм технологияләр өлкәсендә магистратураны тәмамлаучыларны эшкә урнаштыру буенча – беренче урында.
Казан дәүләт аграр университеты авыл, урман һәм балык хуҗалыгы буенча магистратурада – өченче урында.