Укучы Ватанны сакларга һәм эшкә өйрәнәчәк

02 апреля 2024 Admin

Бу хакта «Төбәк белән идарә итү үзәге»ндә узган туры эфир вакытында ТР мәгариф һәм фән министры Илсур Һадиуллин белдерде.

Быелның 1 сентябреннән өлкән сыйныф укучылары өчен «Ватанны саклау һәм иминлек нигезләре» предметы укытыла башлаячак. Анда балалар гадәттән тыш хәлләрдә үз-үзен тоту кагыйдәләрен өйрәнәчәк, беренче ярдәм күрсәтү һәм хәрби әзерлек күнекмәләре алачак.

Үсеп килүче буынга һөнәри юнәлеш бирү – заман таләбе. Шуңа да әлегә кадәр укытылган технология дәресләрендә хезмәткә күбрәк өстенлек биреләчәк.

Шунысын да әйтик: 6–11 нче сыйныф укучылары өчен 2023 елның сентябреннән мәктәпләрдә профориентация минимумы программасы буенча белем бирү гамәлдә. Монысы пәнҗешәмбе көннәрендә дәрестән тыш эшчәнлек формасында үткәрелеп килә.

Альберт САБИР