«Алтын мөнбәр»дә милли конкурс

22 май 2026 Мөршидә КЫЯМОВА

4-8 сентябрендә Татарстан башкаласында «Алтын мөнбәр» XXII Казан халыкара кинофестивале узачак. Фестиваль кинематография дөньясының әһәмиятле мәдәни вакыйгасына әверелде. Танылган режиссерларның иң яхшы фильмнары ел саен шушы кинофорум кысаларында күрсәтелә. Иң яхшы тулы метражлы, документаль һәм анимацион фильмга номинацияләр белән беррәттән «Алтын Мөнбәр» фестивале иң яхшы милли фильмнарны сайлый.

«Алтын мөнбәр» Казан халыкара кинофестиваленең милли конкурсы – Татарстанда төшерелгән, Республика турында сөйләүче яки аның катнашында төшерелгән фильмнар өчен булдырылган махсус программа (копродукция). Гаризаларның күплеген һәм тәкъдим ителә торган эшләрнең югары сыйфатын исәпкә алып, узган ел фестивальнең оештыру комитеты хәтта Милли кино программасын киңәйтергә карар кабул итте. Нәтиҗәдә Милли конкурс кысаларында элек булган кебек ун түгел, ә ундүрт фильм тәкъдим ителде.

Милли конкурсның төп номинацияләре: «Иң яхшы милли фильм», «Иң яхшы документаль милли фильм», «Иң яхшы кыска метражлы милли фильм», «Балалар өчен иң яхшы милли фильм». Быел беренче тапкыр «Иң яхшы милли сериал»ны сайлаячаклар.

«Шунысы мөһим, бу безнең кинематографистлар төшергән сериаллар гына түгел, ә Татарстанга, Казанга, халкыбызга һәм аның мәдәниятенә багышланган проектлар да, документаль сериаллар яки биографик картиналар да булырга мөмкин. Татар телендәге традицион милли сериаллардан тыш, без вертикаль сериаллар, веб-сериаллар һәм башка форматлар кабул итәбез. Бу кино җитештерүдә үзгәрешләргә җавап бирергә мөмкинлек бирә торган заман рухына туры килә торган заманча ресурс. Бүген мондый категорияне кертү тулысынча акланган һәм үз вакытында», - дип саный «Алтын мөнбәр» фестиваленең башкарма директоры Миләүшә Айтуганова.

Конкурста катнашу өчен 2026 елның 1 июненә кадәр электрон адреска гариза җибәрергә кирәк info@kazan-mfmk.com

яки фестивальнең рәсми сайтында махсус анкета тутырырга http://kazan-mfmk.com/application конкурс программасында 2024 елдан да иртәрәк чыгарылмаган фильмнар карала.

Фото: «Татаркино» матбугат хезмәте