Арчада милли белемнең киләчәге турында сөйләштеләр

Чара «Милли белем бирү: традицион кыйммәтләр һәм заманча технологияләр» темасына багышланды.

Пленар утырышта Татарстан Республикасы мәгариф һәм фән министры Илсур Һадиуллин, Арча муниципаль районы башлыгы Алмаз Хисаметдинов, Россия Дәүләт Думасы депутаты Илдар Гыйльметдинов, Татарстан Республикасы Рәисе Аппаратының эчке сәясәт мәсьәләләре департаменты каршындагы милли сәясәтне гамәлгә ашыру идарәсе башлыгы Данил Мостафин, шулай ук Татарстан Республикасы Дәүләт Советы депутаты – Татарстан халыклары Ассамблеясы Советы башкарма комитеты җитәкчесе Ренат Вәлиуллин чыгыш ясадылар. Төп доклад белән министр урынбасары Минзәлия Закирова чыгыш ясады һәм ул милли белем бирүнең хәзерге торышы һәм үсеш перспективалары турында сөйләде.

Фикер алышуның төп темасы булып традицион рухи-әхлакый кыйммәтләрне саклау һәм заманча белем бирү технологияләрен кертү арасында тигезлек эзләү торды. Эш дүрт параллель юнәлеш буенча оештырылды, аларның һәркайсы конкрет аудиториягә юнәлдерелгән иде.

Секцияләрнең төп тематикалары:

1.  Мәгариф идарәләренең (бүлекләренең) милли мәгариф өчен җаваплы методистлары, белгечләре өчен – игътибар үзәгендә 2026/2027 уку елыннан көтелгән үзгәрешләр, укытучының һөнәри үсешен формалаштыруда методик эшчәнлекнең нәтиҗәле формалары һәм ысуллары, шулай ук татар теле һәм әдәбияты буенча республика олимпиадалары һәм имтиханнары нәтиҗәләрен анализлау мәсьәләләре булды. Катнашучылар укучыларның мотивациясен күтәрү өчен системалы эш алып баруның мөһимлеген билгеләп үттеләр.
2.  Туган телдә белем бирүче мәгариф оешмалары җитәкчеләре өчен – арадаш аттестация үткәрү үзенчәлекләре, урта гомуми белем бирү оешмаларында «Төбәгебез тарихы» модулен укыту һәм милли мәктәпне үстерүдә проект эшчәнлегенең роле турында фикер алыштылар.
3. Татар теле һәм әдәбияты укытучыларының район методик берләшмә җитәкчеләре өчен – секция яңартылган ФГОС шартларында педагогның һөнәри үсешенә багышланды. Катнашучылар яңа методик кулланмаларны, дәресләрдә ясалма интеллект куллану мөмкинлекләре һәм сыйныфтан тыш эшчәнлекне оештыруның уңышлы тәҗрибәләре белән уртаклаштылар.
4. Бөтенроссия туган (татар) тел һәм әдәбият укытучылары ассоциациясе бүлекчәләре җитәкчеләре өчен – һөнәри бергәлекне ныгыту, медиаресурсларны куллану һәм мәгарифнең цифрлы үзгәрүе турында сүз барды. Ясалма интеллект: технологик алгарышның ике йөзе темасы һәм Татар теле һәм әдәбияты укытучылары ассоциациясенең педагогның һөнәри үсеш үзәге буларак роле каралды.

Көн программасы бай иде: пленар утырыштан соң кунаклар районның мәгариф мәйданчыкларында булдылар. Катнашучылар Арча мәктәпләре һәм балалар бакчалары базасында оештырылган тәкъдим ителгән проектларны, күргәзмәләрне, осталык дәресләрен һәм ачык дәресләрне югары бәяләделәр. Көн Яңа Кырлайдагы Габдулла Тукай әдәби-мемориаль музей комплексына экскурсия белән тәмамланды, бу заманча мәгарифнең милли мәдәният чыганаклары белән бәйләнешен символик рәвештә ассызыклады.