Бүген, 13 майда, С. Сәйдәшев исемендәге Зур концерт залында яшь музыкантларның "Иртәгә йолдызлар" республика иҗат программасы финалистлары концерты узачак. Бу хакта «Татар-информ»да узган матбугат конференциясендә проект авторы, La Primavera программасы һәм оркестрының сәнгать җитәкчесе, дирижер Рөстәм Абязов сөйләде. 

"Мин бу проект белән бик горурланам, чөнки дөньяда аның аналоглары юк. Әлбәттә, оркестрлар вакыт-вакыт балалар, солистлар белән концертларда катнашырга чакыралар, әмма, кагыйдә буларак, бу я конкурс лауреатлары яки махсус музыка мәктәпләре укучылары. Ә без гадәти җидееллык музыка мәктәпләренә игътибар итәргә телибез. Нәкъ менә шуның белән аерылып торабыз да”, – дип сөйләде Абязов.

Бу сезонда сайлап алу турында республиканың төрле районнарыннан музыка мәктәпләреннән һәм балалар иҗат коллективларыннан меңгә якын талантлы балалар катнашкан. Финал концертында 3 нче Чаллы балалар музыка мәктәбенең «Кояш балалары» хоры, Нурлат балалар сәнгать мәктәбенең «Лазоревый цвет» вокаль ансамбле, шулай ук Татарстанның төрле районнарыннан 28 бала катнашачак.

«Иртәгә йолдызлар»да 7 яшьтән 18 яшькә кадәрге яшь музыкантлар үзләрен сынап карый ала. Татарстан шартлы рәвештә зур шәһәрләр тирәсендәге 6 секторга бүленгән, анда район дәрәҗәсендәге тыңлаулар һәм концертлар уза. Һәр катнашучыны Рөстәм Абязов шәхсән үзе бәяләячәк.

 «Иртәгә йолдызлар " финалистлары концерты 18.30 да башлана һәм ике бүлектә уза.

Автор фотосы