«Ислам картасы» кулланышка керәчәк

01 июля 2024 Альберт САБИРОВ

Татарстан мөфтие Камил хәзрәт Сәмигуллин «Тинкофф» Банкның ислам банкингында әлеге юнәлеш буенча җитәкче Әсхәт Гыйниятов белән эшлекле очрашу үткәрде. Анда сүз Т-Банкының «Ислам картасы»н куллану хакында сүз барды.

Бу продукт Россия өчен зур әһәмияткә ия. Мөфти белән әңгәмә барышында Татарстан мөселманнары Диния нәзарәтендә әлеге продуктны шәригать кануннары буенча аккредитация үткәрү һәм эшләтеп җибәрү белән бәйле мөһим мәсьәләләр дә каралды.

Т-Банкның «Ислам дебет картасы» берничә өстенлеккә ия: анда яшерен комиссияләр һәм хезмәт күрсәтү өчен штрафлар юк, ислам кануннары буенча тыелган өлкәләрдә сатып алуларга чикләүләр билгеләнгән. Картаны Россиянең бөтен территориясендә рәсмиләштерергә мөмкин. Банкоматлар һәм мобиль кушымталар татар телендә дә хезмәт күрсәтәчәк. Продукт быелның өченче кварталында кулланылышка тапшырылырга тиеш.

Очрашуда Татарстан мөфтиятенең Голәмәләр шурасы гыйльми сәркатибе, шәригать фәннәре докторы Рөстәм хәзрәт Нургалиев, мөфтиятенең шәригать мәсьәләләре буенча бүлек җитәкчесе Булат хәзрәт Мөбарәков катнашты, – дип хәбәр итте ТР Диния нәзарәтенең матбугат хезмәте.

Альберт САБИР