Казанда татар теле һәм әдәбиятыннан III Халыкара олимпиада башлана

20 апреля 2015 Мәгариф

Бүген Казанда татар теле һәм әдәбиятыннан III Халыкара олимпиада башлана. Халыкара бәйге ачылу тантанасы Идел буе дәүләт физик культура, спорт һәм туризм академиясенең концертлар залында уза. Анда ТР Премьер-министры урынбасары - ТР мәгариф һәм фән министры Э.Н.Фәттахов катнаша. Оештыручылар - ТР Мәгариф һәм фән министрлыгы, Казан (Идел буе) федераль университеты.

23 апрельгә кадәр дәвам итәчәк олимпиаданың финалында интернет тур нәтиҗәләре буенча сайлап алынган 500 укучы һәм студент катнаша. Алар - Россиянең 22 субъектыннан, 10 чит илдән (Япония, Кытай, Төркия, Бельгия, Финляндия, Канада һ.б.) килгән.

Олимпиаданың 2014 елның 8-21 декабрендә Интернет аша уздырылган турында Россиянең - 34 субъектыннан, 12 чит илдән 11 606 мәктәп укучысы һәм студент катнашты. Алар үзләренең татар теле һәм әдәбияты буенча белемнәрен читтән торып күрсәтте.

Татар теле һәм әдәбиятыннан Халыкара олимпиаданың жюри әгъзалары Казанда узачак турда берничә бирем әзерләде. Укучыларга һәм студентларга телдән һәм әдәбияттан биремнәрне эшләргә, “Минем халкым, туган төбәгем һәм мин!” дигән темага чыгыш ясарга туры киләчәк. Форум вакытында шулай ук Габдулла Тукайга багышланган туган тел форумы, "Мин татарча сөйләшәм" акциясе, "Сәләт" яшьләр фонды катнашында "түгәрәк өстәл" утырышлары һ.б. үткәрелә.

ТР Мәгариф һәм фән министрлыгы.