Рөстәм Минңеханов «Инноватика»да укытучыларны җыйды

15 августта Лаеш районы Усад бистәсендә быел  төзелгән «Инноватика» күп профильле лицеенда Татарстан Мәгариф һәм фән хезмәткәрләренең  август киңәшмәсе үтте, аны ТР Рәисе Рөстәм Миңнеханов алып барды. Бу өлкәдә соңгы елларда ирешкән уңышлар, проблемалар һәм  башкарасы эшләр ТР мәгариф һәм фән министры Илсур Һадиуллин чыгышында бәян ителде.

Мәктәпне балалардан башка күз алдына да китереп булмый. Әле кайчан гына Усадның Г.Тукай исемен йөрткән урамында «Здоровое поколение – Сәламәт буын» лицее ачылган иде. Янәшәсендә «Инноватика» исеме белән  яңа мәктәп  калкып чыкты, биредә 1500 укучы белем алырга тиеш. Моның өчен  монда барлык мөмкинлекләр бар. Бу укытучыларны да, балаларны да шатландыра, ул бүгенге чарада да күренде.

Республикабызның төрле төбәкләреннән килгән мәгариф өлкәсендә эшләүче хезмәттәшләрен берьюлы ике мәктәп каршы алды, кунак итте. Эшлекле чара, соңгы елларда аеруча популярлык алган, «Мәктәпкә әзерләнергә ярдәм ит» акциясе кысаларында бер төркем балаларга затлы букчалар, уку кирәк-яраклары тапшыру белән башланып китте. «Яңа уку елы башында үткәрелә торган матур традициябез бар. Балаларыбызны мәктәпкә әзерләргә булышабыз, аларга уку өчен кирәк-ярак әйберләрен тапшырабыз. Әлеге чара республикабызда киң колач белән актив үтә» – диде Татарстан Рәисе Рөстәм Нургали улы һәм балаларның нәни кулларын кысып, букчаларны аларның иңнәренә салды, балаларга яхшы билгеләренә генә укуларын теләде. Быел әлеге күркәм акция кысаларында 20 меңнән артык укучыга ярдәм күрсәтү күздә тотыла.  

Укытучыларның август киңәшмәсендә киләсе уку елына планнар гына билгеләнеп  калмады.  Мәгариф  өлкәсендә озак еллар дәвамында  фидакяр хезмәт куйган бер төркем хезмәткәрләргә республикабызның мактаулы исемнәре һәм хөкүмәтебез бүләкләре  тапшырылды һәм, анысы да Рәис Рөстәм Миңнеханов кулыннан. Лаеш районының  Советлар Союзы Герое А.Малышев исемендәге «Столбище»  урта мәктәбе директоры  Ирина  Юрьевна Романовага «Татарстанның халык укытучысы» дигән мактаулы исем бирелде.

Шунысын да әйтик: бүгенге көндә мәгариф системасында эшләүчеләр олыгая бара, бүгенге көндә 2,3 мең белгеч җитешми. Аеруча мәктәпләрдә математика, информатика, физика, химия, рус теле укытучылары кирәк, математика белән информатикадан гына да 500 гә якын белгеч җитешми.  Аларны мәгариф өлкәсенә җәлеп итү өчен төрле кызксындыру чаралары күрелә анысы, ай саен яшь укытучының хезмәт хакына 2,5 мең сум өстәмә түләү, «Яшь укытучы» гранты буенча 10 мең сум һәм  авыл мәктәбендә эшләүчегә субсидия бирү каралган. Шул ук вакытта яңа эшли башлаган мөгаллимнәргә бер мәртәбә матди ярдәм күрсәтүче районнар да бар. Сарманда хезмәт юлын башлаган укытучыга 25 мең, Азнакайда моңардан  ике тапкырга артык, Лаеш районында 120 мең сум күләмендә бер мәртәбә матди ярдәм бирелә. Азнакай, Әлмәт, Апас, Бөгелмә, Алабуга, Яңа Чишмә, Чирмешән, Чистай районнарында укытучыларны арендага торак белән тәэмин итү җайга салынган.

Безнең белешмә: Лаешта  бүгенге көндә 26 мәктәп,  1 мәктәп-интернат, 1 балалар йорты, 25 балалар бакчасы эшли.  

 Альберт САБИР.

Автор фотолары