Татарстанда 7 укучы татар теленнән имтихан тапшырачак

Быел Татарстанда туган телдән имтиханны 11 сыйныфны тәмамлаучы 7 чыгарылыш укучысы тапшыра. Ул 23 майда БДИның төп чорында узачак. ТР Министрлар Кабинетында узган брифингта ТР Мәгариф һәм фән министры Илсур Һәдиуллин шул турыда хәбәр итте.

Аның сүзләренчә, Казаннан дүрт һәм Әтнә, Мөслим, Түбән Кама районнарыннан берәр чыгарылыш укучысы туган телдән имтихан тапшыру теләген белдергән. «Узган ел бу имтиханны 8 кеше тапшырган иде, ә өченче ел – 1 укучы», – дип сөйләде ул.

Моннан тыш, 9 сыйныфта укучы 4 046 бала төп дәүләт имтиханын (ОГЭ) туган телләрендә тапшырачак. Бу узган ел белән чагыштырганда 2 685 укучыга күбрәк. Татар теленнән 3 854, чуваш теленнән 139, удмурт теленнән 33, мари теленнән 20 укучы төп дәүләт имтиханын бирүне сайлаган.