Укытучы булу – зур мәртәбә ул

2022 елны тарихка озатып, Яңа 2023 елга аяк басарыбызга да санаулы көннәр калып бара. Ә киләсе ел укытучылар өчен аеруча үзенчәлекле һәм җаваплы ел булырга охшап тора. Ник дисәгез: 2023 ел Россиядә Укытучы һәм остаз  елы дип игълан ителде.
Буыннар алмашы дибез. Бу укытучылар армиясендә аеруча калку чагылыш таба. Алар арасында берәүләре 35 – 40 ел мәктәптә мөгаллимлек итеп, бай тәҗрибә туплаган, ә икенчеләре әле яңарак кына педагогик уку йортын тәмамлап, укытучылык юлында тәүге сукмакларын сала. Олы тормыш тәҗрибәсе туплаган мөхтәрәм мөгаллим-методистлар арасында үз заманында республикабызда һәм чит төбәкләрдәге мәктәпләрдә татарча укытуны оештыру эшләрендә үзеннән зур өлеш керткән, шактый еллар Чаллы шәһәре мәгариф идарәсе башлыгы урынбасары, Татарстан Мәгариф һәм фән министрлыгының милли мәгариф һәм төбәкара хезмәттәшлек бүлеге башлыгы вазифаларын башкарган, бүгенге көндә Казан шәһәре мәгариф идарәсендә  методист булып эшләүче Татарстанның атказанган укытучысы Раиф Кәримулла улы Зиннәтуллин да бар. Укытучы һәм остаз елы уңаеннан аның да яшь коллегаларына әйтер сүзе бар.