Урыссуда яңа гимназия ачыла

"Татар-информ" агентлыгы хәбәр итүенчә, Урыссу бистәсендә февраль башында гимназия ачыла, анда 27 уку кабинеты, остаханәләр, башлангыч сыйныф укучылары өчен уен бүлмәсе бар. Уку йортына нигез ташы 2017 елның июнь аенда салынган, ул вакытта Татарстан Премьер-министры Алексей Песошин да катнашкан иде.
«Биредә гимназия класслары да, гадәти һәм инглиз теле тирәнтен өйрәтелә торган сыйныфлар да булачак. X-XI сыйныф укучыларына профиль белеме (аграр, социаль-гуманитар, физик-математик профиль) биреләчәк, шулай ук универсаль класслар да бар», - диде район мәгариф бүлеге башлыгы Гүзәл Гыйләҗева.

Мәктәптә 400гә якын бала белем алыр, дип көтелә. Гимназия һәм 4нче мәктәп укучыларыннан тыш, өч автобус көн саен Иске һәм Кече Урыссу авыллары, Подгорный бистәсеннән балаларны мәктәпкә алып киләчәк.