Кокушкино музей-тыюлыгы 2027 елда яңадан ишекләрен ача

Музейда хәзерге вакытта реставрация эшләренең беренче этабы тәмамланган. XIX гасыр ахырында Владимир Ульянов (Ленин) яшәгән тарихи флигель тулысынча яңартылган. Әлеге бинаны торгызуга республика бюджетыннан 23 миллион сумнан артык акча бүлеп бирелгән.

Бүгенге көндә белгечләр тарихи интерьерларны  торгызу белән мәшгуль. Алар утарның XIX гасырдагы эчке күренешен мөмкин кадәр төгәл итеп яңадан гамәлгә ашырырга тырышалар.

Киләсе этапта төп йортны реставрацияләү күздә тотыла. Әмма эшләрнең кайчан башлануы смета документлары раслануга бәйле булачак. Музей комплексы рәсми рәвештә әле ачылмаган булса да, бүген үк утар паркында йөрергә мөмкин. Экскурсияләр исә алдан язылу буенча үткәрелә.

Кокушкино утары бай тарихи үткәне белән дә әһәмиятле. Ул Владимир Ленинның бабасы Александр Бланк милке булган. Биредә Ленинның әти-әнисенең туе узган, ә яшь Владимир Ульянов Казан университетыннан куылганнан соң шушы утарда яшәгән.

Автор фотолары