Җәйге лагерьларда 172 меңнән артык бала ял итәчәк

Балаларның сәламәтлеге, имин яшәү рәвеше олыларның һәрвакыт дөрес гамәлләреннән  гыйбарәт. Җәйге чорга аяк басуга балаларның ялын тиешенчә оештыру мәсьәләсе килеп баса. 

“1 июнь Халыкара балаларны яклау көнендә җәйге ял чоры башлана. Бүгенге көнгә 172 мең 55 кешедән гариза алынган. Балаларга  төрле формадагы лагерьларга ял итү оештырыла. Моның өчен  республика бюджетыннан 2 миллиард сумнан артыграк акча каралган. Мәктәп яны лагерьларында да тиешле дәрәҗәдә ял итү оештырылачак”, – ди ТР Премьер-министр урынбасары Ләйлә Фазлыева.

Бүген Татарстан Министрлар Кабинетында узган брифинг балаларның җәйге ялын оештыру темасына багышланды. Премьер-министр урынбасары шулай ук быел хезмәт лагерьларының да популярлаша баруына тукталып узды.  Балаларның иминлеге һәм туклану мәсьәләсе даими тикшерелеп, контрольдә торачагын билгеләп узды.

ТРның Яшьләр эшләре министры Ринат Садыйков балаларның ялын оештыру – республикада иң мөһим социаль мәсьәләләренең берсе, диде. Җәйге лагерьларда  ел саен 200 меңнән артык бала ял итә. Быел 172 меңнән артык баланың ялын оештыру планлаштырыла. 

–    Безнең республика яхшы нәтиҗәләр күрсәтте. Россия төбәкләре арасында балалар ялын оештыру буенча Татарстан алдынгы урында бара. Әлеге юнәлеш буенча җаваплы булган өлкәләр зур тырышлык күрсәтә, – диде министр. Шулай ук ул ял итү программалары белән дә таныштырып узды. 

Автор фотолары