«Алтын мөнбәр» фестивале гаризалар кабул итә

«Алтын мөнбәр»нең сайлап алу комиссиясе рәисе Нина Кочеляева – продюсер, яңа культурология институты директоры. Бөтенроссия дәүләт кинематография институтының кинотеатр методикаларын эшләү һәм сынау бүлегенең әйдәп баручы белгече сүзләренә караганда, конкурска бирелгән эшләрнең географиясе һәрвакыттагыча киң.

«Инде төрле номинацияләрдә 230 дан артык гариза килгән: тулы метражлы уен киносы, документаль, кыска метражлы фильмнар, анимация. Ислам төбәге илләреннән, гарәп дөньясыннан эшләр күп. Элеккечә, анда барган хәрби гамәлләргә карамастан, Ираннан кинематографистлар күп эшләр җибәргән. Төркия, Казахстан, Таҗикстан, Һиндстан, Кытай, Филиппин, Көньяк Кореядан шактый күп гаризалар килгән. Европа илләреннән эшләр бар. Латин һәм Үзәк Америкадан берничә  гариза килде, әмма алда тагын ике ай гариза кампаниясе булуын исәпкә алып, аларның саны артачак», – дип хәбәр итте Нина Кочеляева.

«Алтын мөнбәр»Казан халыкара кинофестивале  Татарстан башкаласында 2005 елдан бирле «Мәдәниятләр диалогы аша – диалог мәдәниятенә» девизы астында уза. Фестиваль программасына, авторның диненә карамастан, игелеккә, тынычлыкка һәм гаделлеккә өндәүче илебез һәм дөнья кинематографының иң яхшы фильмнары сайлап алына.

«Быел тәкъдим ителгән фильмнарда күтәрелгән темалар төрле: гаилә, этник, социаль. Хәтта сәяси триллерлар да бар, бу, мөгаен, сәяси борылышлар белән бәйле социаль тетрәнүләр вакытында актуальдер. Һәм, әлбәттә, фестивальгә гариза биргән авторларның күбесе фестиваль регламентына йөз тота, анда төп позиция белән мәдәниятара диалог тора. Быел без тамашачыларны сыйфатлы кинотасмалары белән сөендерербез дип ышанам», диде фестивальнең сайлап алу комиссиясе рәисе Нина Кочеляева.

Фестивальне оештыручылар билгеләп үткәнчә, «Алтын мөнбәр»нең тагын бер миссиясе-кинематографта яңа исемнәр ачу. Һәм быел инде талантлы яшь авторларның фильмнары, танылган режиссерлар картиналары белән беррәттән, игълан ителгән, дип хәбәр итә Татаркино оешмасының матбугат хезмәте. 

Исегезгә төшерәбез, конкурста катнашу өчен гаризаларны 2026 елның 1 июненә кадәр җибәрергә кирәк. Конкурс шартлары буенча, фильмнар 2024 елдан да иртәрәк чыгарылмаган булырга тиеш.

Фото: «Татаркино» матбугат хезмәте