«Апуш»лар паркта спектакль куя

7 сентябрьдә «Апуш» балалар театр студиясе ​​​​​Казанның «Елмай» балалар паркында спектакль күрсәтәчәк. Тамашаны теләгән һәркем күрә ала, дип хәбәр итә Казан мэриясенең матбугат үзәге.

Спектакль Габдулла Тукайның бала чагына багышланган.

«Кечкенә Апуш үзен тәрбиягә алган гаилә, Сәгъди абыйга килә. Төнге күктә йолдызларга карап, ул мәхәббәт, игелек һәм тылсым тулы әкият дөньялары турында хыяллана. Аны инде татлы йокы каплый... Бәлки, малайның төшләре Габдулла Тукайның бөек тарихлары булыр? » – дип сөйли сюжет турында оештыручылар.

Шәһәрлеләрне 17:00 дә парктагы сәхнә янында көтәчәкләр.

Фото: kzn.ru