Казан метросына бәяләр кыйммәтләнә

04 августа 2021 Мәгариф

Һай, рәхәт тә инде метрода элдертүләре! Ярты сәгать дигәндә Казанның бер читендәге Авиатөзелеш районыннан башкаланың икенче бер очындагы Имәнлек урамына илтә дә куя инде. Әле менә Казан метросының икенче чираты да сафка бассамы!? Казан каласында гомер иткәнеңә мең кат шөкер итеп, сөенеп яшиселәребез алда әле...
Тик бер рәхәтнең бер михнәте булмый калмый икән шул. Ник дисәгез, иртәгәдән, 5 августтан Казан метросында йөрү кыйммәтләнәчәк: билет бәясе инде 30 сум түгел, ә 35 сум тәшкил итәчәк. Шул ук вакытта банк һәм транспорт карталарыннан түләгәндә юл бәясе элеккечә кала – 30 һәм 27 сум. Юл йөрү билетларына да тариф үзгәрмәячәк – 100 тапкыр йөрүнең һәркайсы 20 сумга төшә. Югыйсә, Казанның җир өсте җәмәгать транспортында йөрү бәясе быелның 1 мартында арткан иде. Болай булгач, инде бездәй – җир өстендәгеләр өчен генә түгел, җир астында да тормыш итүләр кыйммәтләнгән, күрәсең. шулай булмаса, биш ай үтәр-үтмәс метрода билет хакын 5 сум сумга күтәртеп куймаслар иде.

Таһир САБИРҖАНОВ

Язмага реакция белдерегез

Реакция язылган инде

Комментарийлар

Теркәлергә

Казан укучысы V Европа юниорлар олимпиадасында катнашачак

04 августа 2021 Мәгариф

Казан укучысы информатика буенча V Европа юниорлар олимпиадасында Россия җыелма командасы составына керде. Мондый югары дәрәҗәдәге халыкара ярышта илне Н.И. Лобачевский КФУ лицее укучысы Ренат Кәримов тәкъдим итәчәк.
Ярыш 24-нче августтан 28-нче августка кадәр дистанцион форматта узачак. Олимпиаданы оештыручы булып Румыния чыгыш ясаячак. Ренат белән бергә Россия җыелмасы составына өч Мәскәү укучысы – Дарья Грекова, Алексей Васильев һәм Иван Пискарев керде. Команда белән МДУ Махсус укыту-фәнни үзәгенең информатика кафедрасы мөдире Елена Андреева җитәкчелек итә.
Элегрәк Ренат Кәримов күп тапкырлар Европа, халыкара олимпиадалар һәм тематик турнирлар призеры булган. Аның медальләре копилкасында «Джон Атанасов» (Болгария) информатика буенча Халыкара көзге турнирның бронза һәм алтын медале һәм юниорлар арасында программалаштыру буенча Info(1) Cup (Румыния) халыкара турнирда алтын медаль, шулай ук ул EJOI (Тбилиси) программалаштыру буенча яшүсмерләр арасында Европа чемпионатының абсолют җиңүчесе дип танылган.
Моннан тыш, ике ел рәттән Ренат информатика буенча Бөтенроссия олимпиадасының йомгаклау этабында призер булган. Быел егет информатика буенча Россия турнирларында, аерым алганда, Иннополис университетының Ачык олимпиадасында һәм Мәскәү олимпиадасында берьюлы берничә бүләк алган, дип хәбәр итә ТР Мәгариф һәм фән министрлыгының матбугат хезмәте.