Казанда джиу-джитсу буенча дөнья чемпионаты уза

 Казан беренче тапкыр шушы дәрәҗәдәге халыкара джиу-джитсу ярышларын кабул итә. Турнирны TWWBJJ джиу-джитсу Россия лигасы Татарстан Республикасы мөселманнары Диния нәзарәте ярдәме белән оештыра. Чемпионат «Казан – ислам дөньясының мәдәни башкаласы» статусы уңаеннан тормышка ашырыла.

 Ярышларда 1300 нән артык спортчы катнашуы көтелә. Катнашучылар арасында Россия, Төркия, Әзербайҗан, Казахстан, Үзбәкстан, Кыргызстан, Таҗикстан, Берләшкән Гарәп Әмирлекләре, Беларусь, Бразилия, Корея, Грузия, Испания, Абхазия һәм Әрмәнстан вәкилләре бар. Турнирда Татарстаннан һәм Россиянең башка төбәкләреннән килгән мөселман яшьләре дә чыгыш ясаячак,- дип хәбәр итте Тамраз Бахышов  – джиу-джитсу буенча TWWBJJның Россия Лигасы президенты.

Келәмгә балалар да, өлкәннәр дә чыгачак

 Ярышлар ир-атлар, хатын-кызлар, яшүсмерләр һәм балалар арасында тугыз авырлык категориясендә узачак. Программада мөмкинлекләре чикләнгән балалар һәм өлкәннәр өчен параджитсу категориясе дә каралган.

 Чемпионатның рәсми ачылышы 10 октябрьдә 8:40 сәгатькә билгеләнгән, ә беренче көрәшләр 9:00 сәгатьтә башлана. 11 октябрьдә 19:00 сәгатьтә TWW Team Fights Kazan, TWW Super Fight 7 һәм TWW Junior 12 кысаларында команда очрашулары узачак.

Айрат Кәлимуллин истәлегенә

 Чемпионатның Айрат Кәлимуллин истәлегенә багышлануы аерым әһәмияткә ия. Ул Татарстанда джиу-джитсу үсешенә зур өлеш керткән тренерларның берсе булган, республика федерациясен җитәкләгән. Шулай ук СССР җыелма командасын 1992 елгы Изге ният уеннарына әзерләүдә катнашкан тренерларның берсе буларак билгеле. Айрат Кәлимуллин ветераннар арасында джиу-джитсу буенча дөнья чемпионы исеменә 2013 елда Берләшкән Гарәп Әмирлекләрендә лаек була. Ул самбо һәм дзюдо буенча спорт мастеры, джиу-джитсу буенча кара билбау иясе дә булган. Тренер 2022 елда вафат була. Аның шәкертләре бүген дә халыкара ярышларда Татарстан һәм Россия данын яклый, яшь спортчыларны тәрбияли.

Спорт — яшьләрне тәрбияләү чарасы

“Турнирның максатлары арасында физик культураны һәм сәламәт яшәү рәвешен популярлаштыру, спортчыларның һәм хөкемдарларның осталыгын арттыру, яшьләргә патриотик тәрбия бирү”, - диде Татарстан мөфтие, спорт мастеры һәм традицион джиу-джитсу буенча 1 дан кара билбау иясе, джиу-джитсуның бразияле төре буенча көрән билбау иясе Камил хәзрәт Сәмигуллин.

Джиу-джитсу спортчылардан физик әзерлек кенә түгел, ә түземлек, тәртип, үз-үзеңне контрольдә тоту һәм көндәшеңә хөрмәт белән карауны да таләп итә. Халыкара ярышлар яшьләргә үз мөмкинлекләрен сынап карарга, тәҗрибә тупларга һәм башка илләрдән килгән спортчылар белән аралашырга шартлар тудыра.

Казан өчен әлеге чемпионат спорт ярышлары гына түгел, ә шәһәрнең халыкара мәдәни һәм спорт мәйданчыгы буларак мөмкинлекләрен күрсәтүче вакыйга да.

Белешмә: Чемпионат «Ак Барс» көрәш сараенда (Казан шәһәре, Фатыйх Әмирхан урамы, 1г) узачак. Ярышлар турында тулырак мәгълүматны оештыручыларның рәсми ярышлар битендә⁠ табарга мөмкин.

Автор фотолары.