Татарстан укытучысы туган телләр укытучылары бөтенроссия мастер-классында призер (ФОТО)

Туган телләр укытучыларының Мәскәүдә узган бөтенроссия мастер-классында Казанның 4 нче гимназия-интернатында татар теле һәм әдәбияты укытучы, “Мәгариф” журналының авторы Илдар Саяхов икенче урын яулады һәм тамашачы мәхәббәтенә лаек булды.

ТР Мәгариф һәм фән министрлыгы матбугат хезмәте хәбәр иткәнчә, сынауларның беренче көнендә бәйгедә катнашучылар “Төбәгем, мәктәбем, һөнәри эшчәнлегем” һәм “Милли костюм” дигән темаларга үз эшләрен тәкъдим иткән. Икенче көнне дәресләргә методик анализлар видео аша күрсәтелгән.

Әлеге бәйге быел туган телләр укытучылары арасында Федераль мәгарифне үстерү институты катнашында сигезенче тапкыр оештырылды. Анда Россия Федерациясенең 16 төбәгеннән 21 педагог катнашты.