“Бүгенге көндә республикабызда 89 кешегә грипп диагнозы куелды. Шуларның 39ы балалар (гомумән алганда, Татарстанда ОРВИ белән авыручылар саны 25831кеше). Авыручыларның берсе дә гриппка каршы прививка ясатмаган һәм барысында да Н3N2 грипп вирусы”, - диде Кулланучыларның хокукларын яклау һәм кеше иминлеге өлкәсендә күзәтчелек итүче федераль хезмәтнең ТР буенча идарә җитәкчесе урынбасары Л. Г. Авдонина “Татаринформ” мәгълүмат агентлыгы үткәргән брифингта.

Бу атна гриппның беренче атнасы гына әле. Ул, гадәттә, 7-8 атна дәвам итә. Халык ОРВИ хакында “дәвалансаң җиде көндә бетә, дәваланмасаң бер атнада” дип шаяртса да, грипп башка җитди авырулар килеп чыгуга җирлек тудыруы белән куркыныч. Шуңа табиблар катгый итеп, үз белдегегез белән дәваланмагыз, гриппның беренче билгеләре күренүгә үк табибка мөрәҗәгать итегез, диләр. Ә беренче билгеләре: югары температура, баш, күз алмасы авырту, тамак төбе кыру, шулай ук борыннан кан китәргә һәм тәнгә геморрагик тимгелләр чыгарга да мөмкин.

Белгечләр әйтүенчә, гриппның нинди генә төре килсә дә, авыру үзе түгел, ә “өзлегү” бирүе куркыныч.

Фоторәсемнең чыганагы: http://ruslekar.info/Gripp-ne-zarazen-1364.html