Фән һәм медиа

Лицейның «Җомга кунагы» проекты – укучыларда милләтебез белән горурлану хисе тудыра торган чара. Һәр атнаның җомгасында танылган язучылар, шагыйрьләр, рәссамнар, галимнәр белән очрашу үткәрелә. Бу очрашулар – укучылар өчен чын мәгънәсендә бер бәйрәм, үз тамырларына кайту мөмкинлеге.

Бөтендөнья татар конгрессы белән берлектә үткәрелә торган Г. Акыш исемендәге халыкара конференция географиясе киң булган чарага әверелде. Быелгы уку елында конференциядә татар әдәбияты тарихы, күренекле шәхесләребез, чит төбәкләрдә яшәүче милләттәшләребез тормышы турында кызыклы эшләр белән республика мәктәпләреннән генә түгел, Киров өлкәсе, Чувашия Республикасы, Төркиядән дә чыгышлар тыңланды.

Лицейда ачылган «Акыл» өстәмә белем бирү мәктәбе – замана белән бергә атлауның ачык мисалы. Биредә укучылар фән дөньясындагы иң алдынгы тәҗрибәләр белән танышалар, төрле юнәлешләрдә проектлар эшлиләр. Үзәк информатика, робототехника, программалаштыру, микробиология, дизайн юнәлешләре буенча иң заманча җиһазлар һәм тәҗрибәле белгечләр белән тәэмин ителгән. Әлеге үзәккә йөргән укучыларның беренче җиңүләре һәм республикабыз Рәисенә үз эшләрен күрсәтә алулары – проектның уңышлы булуын дәлилли.

84 нче лицей – фән һәм һөнәр юлында алга атлаучы уку йорты. Ләкин милли белем бирүдә иң мөһим нәрсәләрнең берсе – ул гаилә җылысы, ата-ана белән мәктәп арасындагы ышанычлы бәйләнеш. Ә менә бу юнәлештә иң зур тәҗрибәгә ия булган уку йорты – 54 нче татар гимназиясе.

Венера МӘГЪДҮМОВА,

Яр Чаллы шәһәре мәгариф идарәсенең

гомуми белем бирү бүлеге баш белгече

Фото шәхси архивтан