Минем уңышлар формуласы

Зәй районы Кадер урта мәктәбенең I квалификация категорияле башлангыч класслар укытучысы. Эш стажы – 21 ел.

Минем хезмәт юлым 1992 елда туган мәктәбем – Кадер мәктәбендә башланды. Укытучы булу, нәни балаларга белем һәм тәрбия бирү минем мәктәп елларымның изге хыялы иде. Шушы хыялымны тормышка ашыру максаты белән, 1988 нче елда мин Чаллы педагогика институтына укырга кердем. 1992 нче елда башланган җаваплы, тынгысыз һәм шул ук вакытта мавыктыргыч, кызыклы булган хезмәт юлыма - 21 ел.

 Минем төп максатым – белемле чын Кеше тәрбияләү. Чын кеше генә һөнәри осталык үрләрен яулый ала. Чөнки ул кешеләр арасында гына яшәми. Ә алар өчен дә яши. Монысы тагын да җаваплырак эш. Бу максатка ирешү өчен, мин эшне укучыларда оешканлык тәрбияләүдән башлыйм. Балаларның теләкләрен исәпкә алып вазифалар бирелә. Теләп, яратып башкарылган эш кенә тиешле нәтиҗәләр бирә. Ә нәтиҗәләр сыйныф почмагында яктыртылып барыла. Мәктәп белән балалар бакчасы арасында да дәвамлы эш алып барыла, табигатьне саклау, сәламәт яшәү рәвеше, дуслык турында спектакльләр күрсәтелә. Шулай итеп, җаваплылык, дуслык, үзара булышу хисләре тәрбияләнә.

 Укытучыларга яңа федераль стандартлар нигезендә тормышта югалып калмаслык, үз урынын табарлык көчкә ия булган, белемле, әхлаклы, бүгенге хезмәт базары шартларында көндәшлек сыйфатларына ия булырдай буынны тәрбияләү бурычы куела. Бу максатка ирешү өчен, барлык мөмкинлекләрдән файдаланырга тырышабыз. Заманадан артта калмас өчен, дәресләребездә яңа методлар кулланабыз. Балалар саны ким булганга күрә, кайчак элементларын гына кулланырга туры килә.

Укучыларның мөстәкыйльлеген һәм иҗади эшчәнлеген, логик фикерләү сәләтен үстерү максатыннан, дәресләрдә дифференцияле биремнәр бирелә. Алар арасында мөстәкыйль рәвештә тәҗрибәләр, күзәтүләр ясау, фикерләү таләп итүче мәсьәләләр чишү, хикәя язу өчен үзлекләреннән план төзү кебек эшләр бар. Аларның иҗат җимешләре аша хыялларын беләм. Шул хыялны тормышка ашыру өчен, булдыра алганча ярдәм итәм.

Хезмәтемдә укучыларда тәртиплелек, дөреслек, пунктульлелек, сабырлык, ихтирамлык сыйфатлары, үз-үзеңә ышаныч булдырырга тырышам.

 Хәзерге заман авыл укытучысы өчен түбәндәге сыйфатлар иң кирәклеләре дип саныйм:

- үз фәнеңне яхшы белү;

- балаларны ярату, аларның шәхесен ихтирам итү, аларга кеше итеп карау;

- укучыларның яшәү шартларын, сәламәтлекләрен белү;

- укытучының активлыгы, һәрвакытта иҗади эзләнүдә булу. Дәрестә уеннарны, методларны оста куллану. Алган белемнәрнең тормышта нәрсә өчен кирәк булачагын аңлату;

- укытучының тышкы кыяфәте, үз-үзен тотышы.

Минемчә, шушы сыйфатларга ия булган укытучыларга балалар үзләреннән-үзләре тартылырлар, киләчәктә аңа охшарга тырышачаклар. Барлык һөнәр кешеләренә караганда да укытучы һәр яктан гүзәл булырга тиеш. Бу – хакыйкать.